సాఫ్ట్‌వేర్‌ ఉద్యోగినికి టోకరా

పెనమలూరు, న్యూస్‌టుడే: పెనమలూరు నుంచి లండన్‌ వెళ్లిన సాఫ్ట్‌వేర్‌ ఇంజినీరు నుంచి రూ.5.75 లక్షలు ఆన్‌లైన్‌ మోసానికి పాల్పడిన వ్యక్తులపై పెనమలూరు పోలీసులు కేసు నమోదు చేశారు. పోలీసుల కథనం ప్రకారం.. పెనమలూరుకు చెందిన ఓ యువతి సాఫ్ట్‌వేర్‌ ఇంజినీరు. ఆమె భర్త లండన్‌లో నివసిస్తుండటంతో కొద్దిరోజుల క్రితం భర్త వద్దకు వెళ్లింది. గత నెల 29వ తేదీన ఆమెకు గుర్తుతెలియని వ్యక్తి ఫోన్‌ చేశాడు. తాను బ్రిటిష్‌ హైకమిషన్‌ కార్యాలయం నుంచి మాట్లాడుతున్నట్లు పేర్కొంటూ వీసా దరఖాస్తులో పూర్తి వివరాలు తెలుపలేదని, నీతో పాటు కుటుంబ సభ్యులను అరెస్టు చేయాల్సి వస్తుందని బెదిరించాడు. అరెస్టుల నుంచి తప్పించుకోవాలంటే రూ.5.75 లక్షలు జరిమానా చెల్లిస్తే సరిపోతుందని చెప్పడంతో భయాందోళనలకు గురైన ఆమె ఈ మొత్తాన్ని విడతల వారీగా ఆన్‌లైన్‌లో అతను తెలిపిన ఖాతాలకు పంపింది. ఆ తర్వాత తాను మోసపోయినట్లు గుర్తించి కుటుంబ సభ్యులకు తెలుపడంతో ఆమె తల్లి బుధవారం పెనమలూరు పోలీసులకు ఫిర్యాదు చేసింది. పోలీసులు కేసు నమోదు చేసి దర్యాప్తు చేస్తున్నారు.