రూ.లక్షలు పోశారు.. లక్ష్యాన్ని మరిచారు!

గన్నవరం గ్రామీణం, న్యూస్‌టుడే

పాఠశాలలో చదువుతున్న విద్యార్థులు

ప్రభుత్వ పాఠశాలలను అత్యాధునిక హంగులతో తీర్చిదిద్దేందుకు ఎంతో ప్రతిష్ఠాత్మకంగా చేపట్టిన పనులు నిరుపయోగంగా దర్శనమిస్తున్నాయి.  ఉంగుటూరు మండల కేంద్రంలోని మండల పరిషత్తు ప్రాథమిక పాఠశాలకు నాడు-నేడు మొదటి విడతలో భాగంగా రూ.24 లక్షలను ప్రభుత్వం కేటాయించింది. గతంలో మొత్తం 104 మంది విద్యార్థులు విద్యను అభ్యసిస్తుండగా.. నూతన విద్యా విధానం అమలులో భాగంగా 3, 4, 5వ తరగతులు స్థానిక జడ్పీలో విలీనం అయ్యాయి. దీంతో ప్రస్తుతం పాఠశాలలో 1, 2వ తరగతికి చెందిన కేవలం 24 మంది మాత్రమే చదువుతున్నారు. గతంలో నలుగురు ఉపాధ్యాయులు అందుబాటులో ఉండగా.. తాజాగా ఇద్దరే మిగిలారు. ఇదిలా ఉండగా పాఠశాలకు కేటాయించిన ఆర్‌వో వాటర్‌ ప్లాంట్‌ మూలకు చేరడంతో చిన్నారులు తాగునీటికి తీవ్ర ఇబ్బందులు పడుతున్నారు. ఇంటి వద్ద నుంచి సీసాలతో నీళ్లు తెచ్చుకుంటున్నారు. రానున్న విద్యా సంవత్సరం నుంచి అయినా విద్యార్థుల సంఖ్యను పెంచేందుకు ఉపాధ్యాయులు కృషి చేసి వెచ్చించిన ప్రభుత్వ నిధులను సద్వినియోగం చేసుకోవాలని ప్రజలు కోరుతున్నారు. ఇటీవల స్థానిక అంగన్‌వాడీ కేంద్రాన్ని పాఠశాల ఆవరణలోని ఓ భవనంలోకి తరలించారు.