Andhra News: డ్రగ్‌ ఇన్‌స్పెక్టర్‌ నగ్న వీడియోల కలకలం

ఒంగోలు నేరవిభాగం, న్యూస్‌టుడే: వైద్య ఆరోగ్య శాఖకు అనుబంధంగా పనిచేసే ఓ డ్రగ్‌ ఇన్‌స్పెక్టర్‌కు చెందిన నగ్న వీడియోలు ఇప్పుడు సామాజిక మాధ్యమాల్లో కలకలం సృష్టిస్తున్నాయి. ఆ ఇన్‌స్పెక్టర్‌ ప్రకాశం జిల్లాలోని పశ్చిమ ప్రాంతానికి చెందిన ఒక కళాశాల నిర్వాహక భాగస్వామికి అల్లుడు. ప్రస్తుతం ఏలూరు జిల్లా తణుకులో పనిచేస్తున్నారు. కర్నూలులో విధులు నిర్వహించే సమయంలో తనతో పాటు పనిచేసే ఒంగోలుకు చెందిన ఓ మహిళా అధికారిణిని లోబరుచుకుని లైంగిక వేధింపులకు గురిచేసినట్టు ఆరోపణలు వచ్చాయి. ఆమె ప్రస్తుతం విజయవాడలో పనిచేస్తున్నారు. వీరిద్దరూ కలిసి కొంతకాలం జీవనం సాగించినట్టు సమాచారం.

ఈ క్రమంలోనే తన భార్యకు విడాకులిచ్చి పెళ్లి చేసుకుంటానంటూ ఆ అధికారిణిని నమ్మించి మోసగించినట్లు తెలిసింది. ఈ విషయమై కర్నూలు జిల్లాలో పనిచేసే సమయంలోనే ఆమె అక్కడి అధికారులకు ఫిర్యాదు చేయగా కౌన్సెలింగ్‌ నిర్వహించినట్లు సమాచారం. అయినా తనకు న్యాయం జరగలేదంటూ ఆమె ఇప్పుడు మీడియాను ఆశ్రయించారు. ఈ విషయమై ఆ డ్రగ్‌ ఇన్‌స్పెక్టర్‌ మాట్లాడుతూ.. కర్నూలులో పోలీసులు కౌన్సెలింగ్‌ నిర్వహించి ఆమెను మందలించారని.. కుటుంబం నుంచి తనను విడదీయడానికి ఆ అధికారిణి బెదిరింపులకు పాల్పడుతోందని అన్నారు. ఈ వీడియోల వ్యవహారం ఇప్పుడు జిల్లాలో చర్చనీయాంశంగా మారింది.