అంబులెన్స్‌లకు సుస్తీ..!

గొల్లపూడి మార్కెట్‌ యార్డులో మూలపడిన 108 వాహనాలు

ఈనాడు, అమరావతి: ఉమ్మడి కృష్ణాజిల్లాల్లోని మండలాల్లో తిరిగే 108 అంబులెన్స్‌లు మరమ్మతుల పేరుతో నిత్యం గొల్లపూడి మార్కెట్‌ యార్డుకు వస్తున్నాయి. బ్రేకు సమస్య, డోర్‌, దీపాలు, ఇంజిన్‌, టైర్ల సమస్యలతో వాహనాలు వస్తుంటే నిర్వహణ కోసమని 3 రోజులు ఇక్కడే ఆపేస్తున్నారు. హైదరాబాద్‌ నుంచి సామాన్లు ఇండెంట్‌ పెట్టి తెప్పించిన తర్వాత వీటికి బిగించి పంపడానికి ఆలస్యమవుతుండటంతో ఆయా మండలాల్లో అత్యవసర వైద్యసేవలకు అంతరాయం ఏర్పడుతోంది. మరమ్మతు కాని వాటి నుంచి విడిభాగాలను తీసి ఇతర వాహనాలకు వేయడం వల్ల కొన్ని పనికిరాకుండా మూలపడి కనిపిస్తున్నాయి.