ఈ లేఔట్లోకి వెళ్లేదెలా ?

ఆక్రమణలకు గురౌతున్న రహదారి

లేఔట్‌ పక్కనే తవ్విన పెద్ద గొయ్యి (డ్రైనేజీ)

కోడూరు (అవనిగడ్డ), న్యూస్‌టుడే: కోడూరులో సాయిబాబా గుడి ఎదురుగా ఉన్న జగనన్న లేఔట్లోని ప్రధాన రహదారి రోజుకో రకంగా ఆక్రమణలకు గురికావడం, వరి నాట్లు వేయడం వంటి సంఘటనలతో లోపలకు వెళ్లడానికి రహదారి లేకుండా పోతోంది. లబ్ధిదారులను ఎంపిక చేసి, పట్టాలిచ్చి రెండేళ్లు గడిచినా రహదారి సౌకర్యం లేక లబ్ధిదారులు నిర్మాణాలు చేపట్టినా ముందుకు సాగని పరిస్థితి. ఇసుక, కంకర, ఇటుకలు లోపలకు తీసుకువెళ్లడానికి ఇబ్బందులు ఎదుర్కొంటున్నారు. ఇప్పటికే కొంత మంది రహదారిని ఆక్రమించి నాట్లు వేసినా పట్టించుకోని అధికారులు, బోదులు తవ్వించినా కూడా స్పందించకపోవడం విడ్డూరంగా ఉందని లబ్ధిదారులు ఆశ్చర్యపోతున్నారు. జేసీబీతో మురుగు నీరు బయటకు పోవడానికి బోదు తవ్వించినా కూడా అధికారులు స్పందించడం లేదని, అటువంటి వారిపై అధికారులు చర్యలు తీసుకోవాలని కోరుతున్నారు.