నిర్వహణ పనుల తీరుపై ఆర్డీఓ విచారణ!

పనులు తనిఖీ చేస్తున్న అధికారులు

ఈనాడు, అమరావతి: ఈ ఏడాది సాగునీటి కాలువల నిర్వహణ పనులు చేయకుండానే బిల్లులు తీసుకోవాలని భావించిన గుత్తేదారులకు చుక్కెదురైంది. ఉమ్మడి కృష్ణా జిల్లాలో జరిగిన సాగునీటి కాలువల నిర్వహణ పనులను తహశీల్దార్లు పర్యవేక్షించి నివేదిక ఇవ్వాల్సి ఉంటుంది. ‘పనులు చేయకుండానే బిల్లులకు రంగం’ శీర్షికన జనవరి 20న ‘ఈనాడు’లో ప్రచురితమైన కథనానికి స్పందించిన కృష్ణా జిల్లా కలెక్టర్‌ రంజిత్‌ బాషా విచారణకు ఆదేశించారు. ఉయ్యూరు ఆర్డీవో విజయ్‌కుమార్‌ను విచారణాధికారిగా వేశారు. జలవనరుల శాఖ ఇంజినీర్లు, ఆర్డీవో సంయుక్తంగా పనులను పరిశీలన చేసి నివేదిక ఇవ్వాలని కలెక్టర్‌ ఆదేశించారు. ఈ నివేదికల ఆధారంగానే బిల్లులు చెల్లించాలని జలవనరు శాఖ అధికారులను ఆదేశించారు. ఉమ్మడి కృష్ణా జిల్లాలో మొత్తం రూ.50 కోట్లతో 267 పనులను చేపట్టారు. వీటిపై పరిశీలన జరగనుంది. ప్రస్తుతం ఆర్డీఓ విజయ్‌కుమార్‌ కంకిపాడు మండలంలో డ్రైనేజీని పరిశీలించారు. అన్ని మండలాల్లో నిర్వహణ పనులను పరిశీలన చేయాల్సి ఉందని చెబుతున్నారు. దీనిపై గుత్తేదారులు హైరానా పడుతున్నారు.