ఇళ్ల తొలగింపులో ఉద్రిక్తత

సహాయ కమిషనరుకు రావికి మధ్య వాగ్వాదం

గుడివాడ(నెహ్రూచౌక్‌), న్యూస్‌టుడే: గుడివాడ పట్టణం లింగవరం రోడ్డులోని కాల్వగట్టుపై పదేళ్లుగా నివాసముంటున్నవారి ఇళ్ల తొలగింపు సోమవారం ఉద్రిక్తతకు దారితీసింది. పురపాలక సంఘం సహాయ కమిషనరు టీవీ రంగారావుతోపాటు ప్రణాళిక విభాగం అధికారులు పొక్లెయిన్‌తో ఇళ్లను తొలగించే ప్రయత్నం చేయగా, బాధిత మహిళలు అడ్డుపడ్డారు. ఈ క్రమంలో వారికి, అధికారులకు మధ్య కొంతసేపు తీవ్ర వాగ్వాదం చోటుచేసుకుంది. తమ ఇళ్లు తొలగించొద్దని బాధితులు అధికారులకు మొరపెట్టుకున్నారు. అయినా వారు కనికరించకపోవటంతో తెదేపా నియోజకవర్గ బాధ్యుడు రావి వెంకటేశ్వరరావు అక్కడికి చేరుకున్నారు.

పొక్లెయిన్‌కు అడ్డంగా ఉన్న మహిళలను లాగుతున్న సిబ్బంది

ఇళ్ల తొలగింపు అన్యాయమని అడ్డు తగిలారు. దీనిపై సహాయ కమిషనరు రంగారావు ఆయనకు బదులిస్తూ కోర్టు ఉత్తర్వులను అమలు చేస్తున్నామన్నారు. నిరాశ్రయులకు ఆసరా కల్పించకుండా ఇళ్ల తొలగింపు సరికాదని రావి వాదనకు దిగారు. అనుమతులు లేకుండా, కోర్టు ఉత్తర్వులను సైతం పట్టించుకోకుండా మట్టి తవ్వకాలు చేస్తున్నవారిపై ఎందుకు చర్యలు తీసుకోవడం లేదని నిలదీశారు. పేద ప్రజలను ఇబ్బంది పెడితే సహించేది లేదన్నారు. దీంతో వారి మధ్య మాటల యుద్ధం జరిగింది. ప్రజలు, తెదేపా నాయకుల నుంచి త్రీవస్థాయిలో వ్యతిరేకత రావడంతో చేసేదిలేక అధికారులు వెనుదిరిగారు. తెదేపా నాయకులు దింట్యాల రాంబాబు, షేక్‌ జానీషరీఫ్‌, సాంబశివరావు, జబీన్‌, వాసు పాల్గొన్నారు.