ప్రభుత్వ ఉద్యోగులుగా గుర్తించే వరకు ఉద్యమం

నిరసనలో పాల్గొన్న సంఘ నాయకులు

మచిలీపట్నం కార్పొరేషన్‌, న్యూస్‌టుడే: అంగన్‌వాడీ కార్యకర్తలను ప్రభుత్వ ఉద్యోగులుగా గుర్తించే వరకు ఉద్యమాలు చేస్తూనే ఉంటామని సంఘ నాయకులు హెచ్చరించారు. తమ డిమాండ్లు పరిష్కరించాలని కోరుతూ సోమవారం మచిలీపట్నంలోని ధర్నాచౌక్‌లో ఏపీ అంగన్‌వాడీ వర్కర్స్‌ , హెల్పర్స్‌ యూనియన్‌ జిల్లా శాఖ ఆధ్వర్యంలో నిరసన కార్యక్రమం చేపట్టారు. ఈ సందర్భంగా పాల్గొన్న సీఐటీయూ రాష్ట్ర కార్యదర్శి ఆర్‌వీ నరసింహారావు మాట్లాడుతూ అంగన్‌వాడీ కార్యకర్తలకు కనీస వేతనం రూ.26వేలు ఇవ్వాలని డిమాండ్‌ చేశారు.అధికారంలోకి రాగానే మెరుగైన వేతనాలు అందజేస్తామని హామీ ఇచ్చిన ముఖ్యమంత్రి ఇప్పటివరకు అమలు చేయలేదని విమర్శించారు. సీఐటీయూ జిల్లా ప్రధాన కార్యదర్శి మాదాల వెంకటేశ్వరరావు మాట్లాడుతూ పెరిగిన ధరలకు అనుగుణంగా వేతనాలు ఇవ్వాలన్నారు. అంగన్‌వాడీ వర్కర్స్‌ అండ్‌ హెల్పర్స్‌ యూనియన్‌ జిల్లా అధ్యక్షురాలు నిర్మలజ్యోతి, ప్రధాన కార్యదర్శి ఎ.రమాదేవి, నాయకులు సీహెచ్‌ నాంచారమ్మ, ఉమారాణి, సువర్ణలత, రేవతి, గోపీలక్ష్మి, విజయలక్ష్మి తదితరులు తమ సమస్యలు వివరించి ప్రభుత్వం ఆదుకోవాలని కోరారు. వివిధ సంఘాల ముఖ్య ప్రతినిధులు హాజరయ్యారు.