హత్య కేసులో నిందితుడికి జీవిత ఖైదు

మచిలీపట్నం (గొడుగుపేట), న్యూస్‌టుడే: హత్యకేసులో నిందితునికి జీవితఖైదు విధిస్తూ న్యాయమూర్తి తీర్పు చెప్పారు. ప్రాసిక్యూషన్‌ కథనం ప్రకారం మచిలీపట్నానికి చెందిన జి. వెంకటేశ్వరరావు(వీరప్పన్న) ఇదే ప్రాంతానికి చెందిన సబీరున్సీనా అనే మహిళతో కలిసి సహజీవనం చేస్తున్నాడు. అతను వేరే మహిళతో కూడా అక్రమ సంబంధం కొనసాగిస్తున్నాడనే దానిపై ఇరువురి మధ్య వివాదం ఏర్పడింది. 2015 సెప్టెంబరు 13న సబీరున్నీసా ఇంట్లో వంట చేస్తున్న సమయంలో వెంకటేశ్వరరావు ఆమెపై కిరోసిన్‌ పోసి గ్యాస్‌పొయ్యిమీద తోసివేయడంతో మంటలు అంటుకోవడం గమనించి పారిపోయాడు. తీవ్ర గాయాలతో ఉన్న ఆమెను జిల్లా ఆసుపత్రికి తరలించగా చికిత్స పొందుతూ పోలీసులకు ఫిర్యాదు చేసింది. అదే ఏడాది అక్టోబరు 6న ఆమె ఆసుపత్రిలో మృతిచెందింది. అంతకుముందు న్యాయమూర్తి ఎదుట మరణవాంగ్మూలం కూడా ఇచ్చింది. ఈ ఘటనపై మచిలీపట్నం పోలీస్‌స్టేషన్‌లో కేసు నమోదైంది. దీనిపై విచారణ నిర్వహించిన మొదటి అదనపు జిల్లా జడ్జి చిన్నంశెట్టి రాజు నిందితుడిపై హత్యానేరం రుజువు కావడంతో జీవితఖైదు, రూ.1000ల జరిమానా విధిస్తూ తీర్పు చెప్పారు. ప్రాసిక్యూషన్‌ తరఫున ఏపీపీ మట్టా రాందాసు 12మంది సాక్షులను విచారించి, వాదనలు వినిపించారు.