గంజాయి విక్రయిస్తున్న ముఠా అరెస్టు

పటమట, న్యూస్‌టుడే: గంజాయి విక్రయిస్తున్న ముఠాను పటమట పోలీసులు అరెస్టు చేశారు. ఆదివారం మధ్యాహ్నం 3 గంటల సమయంలో రామవరప్పాడులోని పాలెంవారి వీధిలో గంజాయి విక్రయం జరుగుతుందని పోలీసులకు సమాచారం అందింది. ఎస్‌ఐ జాన్‌ బాషా సిబ్బందితో కలిసి అక్కడ మాటు వేశారు. గంజాయి సరఫరా చేస్తున్న కంకిపాడుకు చెందిన గుడిసేవా జ్యోతి ప్రకాష్‌, రవి ధనుష్‌, షేక్‌ గౌస్‌ బాషా, రామవరప్పాడుకు చెందిన పాలెం గౌతంలను అదుపులోకి తీసుకుని వారి వద్ద నుంచి 5.3 కిలోల గంజాయి, ఒక ద్విచక్ర వాహనం, నాలుగు సెల్‌ఫోన్లు స్వాధీనం చేసుకున్నారు. ఈ ముఠాలో సుమంత్‌, అలీ పరారయ్యారు. వారి కోసం గాలింపు చర్యలు చేపట్టారు. కేసు నమోదు దర్యాప్తు చేస్తున్నట్లు పోలీసులు తెలిపారు.