నిధులు, అధికారాలు లేకుండా వచ్చి ఏం ప్రయోజనం?

మండల సమావేశంలో అధికార పార్టీ సభ్యుల అసంతృప్తి

హాజరైన ప్రజాప్రతినిధులు, అధికారులు

హనుమాన్‌జంక్షన్‌, న్యూస్‌టుడే: ‘నిధుల్లేవు, అధికారాల్లేవు సమావేశానికి వచ్చి ఏం చేయాలి? గ్రామాల్లో ఏ పని చేయలేకపోతున్నాం.. ఓట్లేసి గెలిపించిన ప్రజలకు మొఖం కూడా చూపించలేని పరిస్థితి నెలకొంది. ఏదో మొక్కుబడిగా వచ్చామంతే.’ అంటూ అధికార పార్టీ మద్దతుదార్లగా గెలిచిన పలువురు సర్పంచులు, ఎంపీటీసీ సభ్యులు మంగళవారం ఎంపీపీ నగేష్‌ అధ్యక్షతన జరిగిన బాపులపాడు మండల పరిషత్తు సర్వసభ్య సమావేశంలో అసంతృప్తి వ్యక్తం చేశారు. మండలంలో సర్పంచులు, ఎంపీటీసీ సభ్యులు కలిసి 51 మంది ఉంటే.. కేవలం 15 మందే హాజరయ్యారు. 17 శాఖలకు సంబంధించి సాధారణ సమీక్ష నిర్వహించేందుకు ఎజెండా రూపొందించగా.. వివిధ శాఖల అధికారులు సైతం డుమ్మా కొట్టారు. వచ్చిన వారు సైతం తమ శాఖకు సంబంధించిన సమీక్ష పూర్తి కాగానే వెళ్లిపోయారు. ఇకపై సమావేశానికి రాని అధికారులకు నోటీసులు పంపుతామంటూ ఎంపీడీవో ప్రభాకర్‌ పేర్కొన్నారు. వైస్‌ ఎంపీపీ చందు రమాదేవి, ఉప తహసీల్దార్‌ వెంకటరమణ, తదితరులు పాల్గొన్నారు.