బీమా సొమ్ము వడ్డీతో చెల్లించాలని తీర్పు

మచిలీపట్నం(గొడుగుపేట),న్యూస్‌టుడే: బీమా సొమ్మును వడ్డీతో సహా చెల్లించాలని వినియోగదారుల కమిషన్‌ శుక్రవారం తీర్పు చెప్పింది. కమిషన్‌ కార్యాలయ ఉద్యోగులు చెప్పిన సమాచారం మేరకు గుడివాడకు చెందిన పిచ్చిరెడ్డి విజయవాడ రెలిగేర్‌ హెల్త్‌ ఇన్స్యూరెన్స్‌  కార్యాలయం ద్వారా తన కుమార్తె కామక్షిని నామినిగా పెట్టి రూ.50లక్షల ప్రమాద బీమా పాలసీ తీసుకున్నారు. తరువాత కొన్నాళ్లకు ఆయన చనిపోవడంతో కామాక్షి బీమా సొమ్ముకోసం సంస్థను ఆశ్రయించగా వారు తిరస్కరించడంతో 2020 ఆగస్టు 31న వినియోగదారుల కమిషన్‌లో ఫిర్యాదు చేశారు. దీనిపై విచారణ నిర్వహించిన కమిషన్‌ అధ్యక్షుడు చింతలపూడి కిషోర్‌కుమార్‌, సభ్యులు  శ్రీలక్ష్మీ రాయల, నందిపాటి పద్మారెడ్డిలు  బీమా సొమ్మును 9శాతం వడ్డీతో, మానసిక వేదన కలిగించినందుకు రూ.50వేలు, ఇతర ఖర్చుల నిమిత్తం రూ.10వేలు కలిపి మొత్తాన్ని 30 రోజుల్లోపు ఫిర్యాదుదారుకు చెల్లించాలని బీమా సంస్థను ఆదేశిస్తూ తీర్పు చెప్పారు.