ధాన్యం కొనుగోలు కేంద్రాలు 31 వరకే

ఎలా నూర్చాలి? ఎప్పుడు విక్రయించాలంటున్న రైతులు

అవనిగడ్డ, న్యూస్‌టుడే: ప్రభుత్వం ఏర్పాటు చేసిన ధాన్యం కొనుగోలు కేంద్రాలు ఈ నెల 31 వరకే కొనసాగుతాయని ప్రభుత్వం ప్రకటించిన నేపథ్యంలో రైతులు ఆందోళన చెందుతున్నారు. దివిసీమ ప్రాంతంలో ఏటా నెల రోజులు ఆలస్యంగా నాట్లు వేస్తారు. వరి కోసిన తర్వాత మినుము విత్తనాలు జల్లడం వలన మినుము నూర్పిళ్లు పూర్తయ్యే వరకు పొలాల్లోకి ట్రాక్టర్లు వెళ్లేందుకు అవకాశం ఉండదు. ఇటీవల మినుము నూర్పిళ్లు పూర్తి కాగా, వరి నూర్పిడులు పూర్తికాని రైతులు ఇంకా ఉన్నారు. ఈ నెల 15 నుంచి తుపాను హెచ్చరికలు జారీ కావడంతో నూర్పిడికి అవకాశం లేకుండా పోయిందని, గురువారం కూడా కొన్ని గ్రామాల్లో వర్ష పడిందని రైతులు చెబుతున్నారు. ఈ పరిస్థితుల్లో వరి కుప్పలు ఎలా నూర్చాలని? ఈ నెల 31లోగా ధాన్యం కొనుగోలు కేంద్రాలకు ఎలా సరఫరా చేయాలని రైతులు ప్రశ్నిస్తున్నారు. కనీసం మరో 15 రోజులపాటు ఈ కేంద్రాలను కొనసాగించాలని కోరుతున్నారు.