‘ఆరోగ్యశ్రీ సేవలకు రుసుం వసూలు చేస్తే చర్యలు’

ఎన్టీఆర్‌ కలెక్టరేట్‌, న్యూస్‌టుడే : కార్పొరేట్‌ ఆసుపత్రుల్లో వైఎస్‌ఆర్‌ ఆరోగ్యశ్రీ హెల్త్‌కేర్‌ ట్రస్టు ద్వారా వైద్య సేవలను పూర్తిగా ఉచితంగా అందించాలని, రోగుల నుంచి అక్రమంగా రుసుం వసూలు చేస్తే యాజమాన్యాలపై కఠిన చర్యలు తీసుకుంటామని కలెక్టర్‌ ఎస్‌.డిల్లీరావు హెచ్చరించారు. నగరంలోని కలెక్టరేట్‌లో జిల్లా క్రమ శిక్షణ కమిటీ సమావేశం నిర్వహించారు. ఆయన మాట్లాడుతూ.. పేదలకు వైద్యం అందించేందుకు ప్రభుత్వం ఆరోగ్యశ్రీ పథకాన్ని అమలు చేస్తోందని, పలు ప్రైవేటు ఆసుపత్రుల్లో రుసుం వసూలు చేస్తున్నట్టు ఫిర్యాదులు వస్తున్నాయని తెలిపారు. ఈ నేపథ్యంలో కమిటీ సభ్యులు ఆసుపత్రులపై పర్యవేక్షించాలని పేర్కొన్నారు. ఫిర్యాదులపై ప్రాథమిక విచారణ పూర్తి చేసి, నివేదికలు అందజేయాలని ఆరోగ్యశ్రీ జిల్లా సమన్వయకర్తను ఆదేశించారు. తిరువూరు అమరావతి ఆసుపత్రి, విజయవాడలోని స్మైల్‌, వంశీ హార్ట్‌ కేర్‌ ఆసుపత్రుల్లో కొంత మొత్తాన్ని వసూలు చేసినట్టు ఆరోపణలు వచ్చినట్టు తెలిపారు.