టెన్నిస్‌ విజేతలు క్రిష్‌, పరిణిత

క్రీడాకారులతో రంగారావు, గోపాల్‌, ప్రసాద్‌ తదితరులు

విజయవాడ క్రీడలు, న్యూస్‌టుడే: స్టార్‌ టెన్నిస్‌ అకాడమీ, గ్లోబల్‌ స్పోర్ట్స్‌ ఫౌండేషన్‌ సంయుక్త ఆధ్వర్యంలో ఆదివారం నిడమానూరులో జరిగిన రాష్ట్ర ఓపెన్‌ టెన్నిస్‌ టోర్నీలో అండర్‌-12 బాలబాలికల విభాగాల్లో వై.క్రిష్‌ (విజయవాడ), పరిణిత కుట్టి (విశాఖ) విజేతలుగా నిలిచారు. బాలుర ఫైనల్‌లో వై.క్రిష్‌ 6-3 స్కోర్‌ తేడాతో అఖిల్‌ (విశాఖ)పై విజయం సాధించగా.. బాలికల ఫైనల్‌లో పరిణిత కుట్టి (విశాఖ) 6-0 తేడాతో కె.హారిక (విశాఖ)పై గెలిచారు. అండర్‌-14 బాలుర ఫైనల్‌లో డి.అఖిల్‌ (విశాఖ) 6-1 తేడాతో జీషన్‌ ఖాన్‌ (విజయవాడ)పై విజయం సాధించగా.. బాలికల ఫైనల్‌లో పరిణిత కుట్టి 6-1 తేడాతో ఇషితా పట్నాయక్‌ (విశాఖ)పై గెలుపొందారు. అండర్‌-16 బాలుర ఫైనల్‌లో టి.వెంకట కృష్ణ చైతన్య (విజయవాడ) 6-3 తేడాతో హుసేన్‌ అగర్వాల్‌ (విజయవాడ)పై నెగ్గగా.. బాలికల ఫైనల్‌లో పి.రూపాదేవి (విజయవాడ) 6-3 తేడాతో ఇషితా పట్నాయక్‌ (విశాఖ)పై విజయం సాధించారు. సాయంత్రం జరిగిన ముగింపు కార్యక్రమంలో నిడమానూరు గ్రామ సర్పంచి శీలం రంగారావు విజేతలకు ట్రోఫీలు, నగదు బహుమతులు అందజేశారు. కార్యక్రమానికి స్టార్‌ టెన్నిస్‌ అకాడమీ డైరెక్టర్‌ కె.గోపాల్‌ అధ్యక్షత వహించి మాట్లాడుతూ ఈ అకాడమీలో తొలిసారిగా ఈ పోటీలు నిర్వహించామని, రాష్ట్రం నలుమూలల నుంచి 60 మంది క్రీడాకారులు పాల్గొనడం చాలా సంతోషంగా ఉందన్నారు. రానున్న రోజుల్లో ఐటా సీఎస్‌-7 పోటీలను నిర్వహిస్తామన్నారు. గ్లోబల్‌ ఫౌండేషన్‌ కార్యదర్శి జీవీఎస్‌ ప్రసాద్‌, టెన్నిస్‌ శిక్షకులు పి.ఆనందకుమార్‌, రవి, సాయి, గిరీశ్‌ పాల్గొన్నారు.