ఫిర్యాదులను తక్షణం పరిష్కరించండి: ఎస్పీ

బాధితుల సమస్య తెలుసుకుంటున్న జాషువా

మచిలీపట్నం క్రైం, న్యూస్‌టుడే: స్పందన కార్యక్రమానికి వచ్చే ఫిర్యాదులకు చట్ట పరిధిలో తక్షణ పరిష్కారం చూపాలని ఎస్పీ పి.జాషువా అధికారులకు సూచించారు. సోమవారం జిల్లాలోని వివిధ ప్రాంతాల నుంచి ఎస్పీ కార్యాలయానికి వచ్చిన వారి నుంచి నేరుగా ఆయన ఫిర్యాదులు స్వీకరించారు. ఉద్యోగం ఇప్పిస్తానంటూ పరిచయమైన వ్యక్తి రూ.5 లక్షలు తీసుకుని మోసం చేశాడంటూ తిరిగి ఇవ్వమంటే చంపేస్తానంటూ బెదిరిస్తున్నాడని గుడివాడకు చెందిన సరిత, చెప్పుడు మాటలు విని భర్త మానసికంగా శారీరకంగా హింసకు గురిచేస్తున్నాడని పమిడిముక్కలకు చెందిన వివాహిత ఫిర్యాదు చే శారు. తన సొంత స్థలంలో నూతనంగా గదిని నిర్మించుకోనీయకుండా కొందరు తనపై భౌతికదాడికి పాల్పడుతున్నారని బంటుమిల్లికి చెందిన సురేష్‌తో పాటు వివిధ వ్యక్తిగత సమస్యల పరిష్కారం కోరుతూ మరికొందరు ఫిర్యాదులు అందజేశారు. వాటిని పరిశీలించిన ఎస్పీ తగు చర్యలు తీసుకోవాలని సంబంధిత పోలీస్‌ అధికారులను ఆదేశించారు.