ఏప్రిల్‌ 4 నుంచి సదరం సేవలు

మచిలీపట్నం కార్పొరేషన్‌,న్యూస్‌టుడే:  ఏప్రిల్‌ 4వ తేదీ నుంచి మచిలీపట్నం సర్వజన ఆసుపత్రిలో సదరం సేవలు అందుబాటులోకి వస్తున్నట్లు ఆసుపత్రి సూపరింటెండెంట్‌ డా.గంటా వరప్రసాద్‌ తెలిపారు. ఆసుపత్రిలో గత రెండునెలలుగా సదరం సేవలు నిలిచిపోవడంతో వివిధ ప్రాంతాలనుంచి వస్తున్న రోగులు పడుతున ఇబ్బందులపై శుక్రవారం ‘ఈనాడు’లో ‘రమ్మంటారు...వస్తే ఉండరు’ అన్న శీర్షికన కథనం ప్రచురితమవగా ఆయన స్పందించారు. ఆసుపత్రిలో కొన్ని విభాగాల వైద్యులు లేకపోవడం, ఉన్నవారు కొందరు సెలవు పెట్టడంతో సమస్య ఏర్పడిందని చెప్పారు. కంటివిభాగానికి చెందిన వైద్యుడిని విజయవాడ ఆసుపత్రినుంచి సదరం నిర్వహించే రోజుల్లో మచిలీపట్నం ఆసుపత్రికి వచ్చేలా ఏర్పాట్లు చేశామన్నారు. దీంతోపాటు వైద్యులకు డిజిటల్‌ టోకెన్స్‌ జారీ ప్రక్రియను కూడా పూర్తి చేశామన్నారు. 4వ తేదీ నుంచి ఇకపై నిర్దేశించిన రోజుల్లో సదరం శిబిరాలు నిర్వహిస్తామని, అందరూ వినియోగించుకోవాలని కోరారు. ఆసుపత్రిలోని అన్ని విభాగాల్లోనూ అధునాతన సేవలు అందుబాటులోకి తెస్తున్నామని రోగులు సద్వినియోగం చేసుకోవాలని సూచించారు.