రాజీ కుదిర్చేందుకే ఫ్యామిలీ కౌన్సెలింగ్‌ కేంద్రం: ఎస్పీ

నియామక పత్రాలు పొందిన వారితో ఎస్పీ జాషువా తదితరులు

మచిలీపట్నం(గొడుగుపేట),న్యూస్‌టుడే: చిన్న చిన్న విభేదాలతోనే భార్యాభర్తలు విడిపోతున్నారని, ఇరువురూ కూర్చుని సామరస్యంగా సమస్యను పరిష్కరించుకోవాలని జిల్లా ఎస్పీ జాషువా అన్నారు. మచిలీపట్నంలోని దిశ మహిళా పోలీస్‌స్టేషన్‌లో ఏర్పాటు చేసిన ఫ్యామిలీ కౌన్సెలింగ్‌ కేంద్రాన్ని శుక్రవారం ఆయన ముఖ్య అతిథిగా పాల్గొని ప్రారంభించారు. ఈ సందర్భంగా ఆయన మాట్లాడుతూ విడిపోవాలనుకునే దంపతులకు కౌన్సెలింగ్‌ ఇచ్చేందుకు ఈకేంద్రాన్ని ఏర్పాటు చేశామని చెప్పారు. ఇరుపక్షాల సమస్యలు తెలుసుకుని వారికి సలహాలు ఇచ్చేందుకు 12మందిని అనుభవజ్ఞులు కేంద్రంలో అందుబాటులో ఉంటారని అన్నారు. అనంతరం విధి నిర్వహణలో ప్రాణాలు కోల్పోయిన 17మంది హోమ్‌గార్డు కుటుంబ సభ్యులకు కారుణ్య నియామకాల్లో భాగంగా ఉద్యోగాలు కల్పించి నియామక పత్రాలు అందజేశారు. ఒకేసారి 17మందికి ఉద్యోగాలు ఇచ్చే అవకాశం తనకు రావడం సంతోషంగా ఉందని చెప్పారు. ఉద్యోగాలు పొందిన వారు శాంతిభద్రతలు పరిరక్షణకు కృషిచేయాలని సూచించారు. ఏఎస్పీ రామాంజనేయులు, ఏఆర్‌ ఏఎస్పీ ఎస్‌వీడీ ప్రసాద్‌ తదితరులు పాల్గొన్నారు.