నావికా దళంలో ఉపాధి అవకాశాలు

విద్యార్థులకు పుస్తకాలు అందిస్తున్న నావికా దళాధికారి భట్టాచార్య తదితరులు

కృష్ణా విశ్వవిద్యాలయం(మచిలీపట్నం),న్యూస్‌టుడే: భారత నావికాదళంలో ఉపాధి అవకాశాలు అపారంగా ఉన్నాయని భారత నావికాదళ అధికారి లెఫ్ట్‌నెంట్‌ కమాండర్‌ భట్టాచార్య అన్నారు. ఆయన పలువురు అధికారులతో కలిసి శుక్రవారం మచిలీపట్నంలోని కృష్ణా విశ్వవిద్యాలయాన్ని సందర్శించారు. ఈ సందర్భంగా ఆయన విద్యార్థులకు వివిధ అంశాలపై అవగాహన కల్పించారు.  దేశపౌరులను నావికాదళంలో చేరేలా ప్రోత్సహించేందుకు విశాఖపట్నం, కాకినాడ, మచిలీపట్నం, నెల్లూరు ఇలా కోస్తాతీర ప్రాంతాల్లో దాదాపు 7,500 కిలోమీటర్లు ప్రయాణించేలా ప్రణాళిక రూపొందించినట్లు చెప్పారు.దీనిలో భాగంగానే విశ్వవిద్యాలయాన్ని సందర్శించినట్లు తెలిపారు.  అగ్నివీర్‌ ఎంపిక ప్రక్రియ, నావికాదళంలో ఉన్న ఉద్యోగ అవకాశాలు, వాటికి కావాల్సిన విద్యార్హతలు తదితర అంశాలను వివరించడంతోపాటు విద్యార్థులకు అన్ని వివరాలతో రూపొందించిన పుస్తకాలను పంపిణీ చేశారు. విశ్వవిద్యాలయ ఎన్‌సీసీ అధికారి డి.రామశేఖరరెడ్డి, విద్యార్థులు పాల్గొని నావికాదళ అధికారులకు స్వాగతం పలికారు. అధికారులు తొలుత ఉపకులపతి రామమోహనరావును కలిసి మెమొంటో అందజేశారు.