మీకు ఓట్లేసి తప్పు చేశాం

పామర్రు ఎమ్మెల్యేను నిలదీసిన సూరసానిపల్లె వాసులు

మొవ్వ(కూచిపూడి), న్యూస్‌టుడే: ఎన్నికల సమయంలో ఓట్ల కోసం మా గ్రామానికి వచ్చావు.. మళ్లీ ఎన్నికల సమయంలో వస్తావా.. అంటూ కృష్ణా జిల్లా మొవ్వ మండలం సూరసానిపల్లె ఎస్సీ వాసులు పామర్రు శాసనసభ్యుడు కైలే అనిల్‌కుమార్‌ను నిలదీశారు. బుధవారం రాత్రి మొవ్వపాలెంలో ఒక ప్రారంభోత్సవానికి వెళ్తుండగా మహిళలు మొవ్వలో ఎమ్మెల్యే కారును అడ్డుకొని ఆగ్రహం వ్యక్తం చేశారు. గత ఎన్నికల్లో మా పల్లె ఓట్లన్నీ వైకాపాకి వేసి తప్పు చేశామని ఆవేదన చెందారు. ఈ సారి కూడా ఎన్నికల్లో ఓట్లు అడగడానికి రావాలని ఎద్దేవా చేశారు. మొవ్వపాలెంలో ఎమ్మెల్యే పర్యటన ఉందని తెలుసుకున్న మంత్రిపాలెం పంచాయతీ పరధిలో గల సూరసానిపల్లె నుంచి ఎస్సీ మహిళలు, వృద్ధులు, విద్యార్థులు రెండు ట్రాక్టర్లపై వచ్చి మా సమ్యలు ఎందుకు పరిష్కరించడం లేదంటూ కారును అడ్డుకొని ఎమ్మెల్యేను నిలదీశారు. ఎమ్మెల్యే అనిల్‌కుమార్‌ వారికి సర్దిచెబుతున్నా వినకుండా మహిళలు తమ గ్రామంలో రహదారులన్నీ పూర్తిగా పాడై తీవ్ర ఇబ్బందులు పడుతున్నామని, గెలిసిన తర్వాత నాలుగేళ్లలో మా గ్రామానికి వచ్చి సమస్యలు పరిష్కరించే వీలు లేదా అంటూ దుయ్యబట్టారు.