ప్రయాణం.. పదిలమిలా

ఎండలో చిన్నారులతో ప్రయాణం ఇబ్బందే. తీవ్రమైన వేడితో కొన్నిసార్లు వడదెబ్బ తగిలే ముప్పు ఉంటుంది. ఈ నేపథ్యంలో కొన్ని చిట్కాలు పాటించాలని నిపుణులు చెబుతున్నారు.

* ముఖ్యంగా ఉదయం 8 గంటల తర్వాత మధ్యాహ్నం 3 గంటలలోపు పిల్లలు, పెద్దలతో ప్రయాణాల వల్ల ఇబ్బందులు పడే అవకాశం ఉంది. రైలు, బస్సుల్లో ప్రయాణించేవారు ఖర్చు ఎక్కువైనా సరే..ఏసీ సదుపాయం ఉండేలా చేసుకోవడం మేలు.

* ఎండ నేరుగా శరీరం, తలపై పడకుండా పెద్ద సైజు టోపీలు ధరించాలి. చలువ అద్దాలు పెట్టుకోవాలి. ప్రమాదకరమైన యూవీ కిరణాల నుంచి శరీరాన్ని కాపాడుకోవచ్చు.

* చర్మం దెబ్బతినకుండా ఎస్‌ఫీఎఫ్‌ 25 కంటే ఎక్కువ ఉన్న క్రీములను వాడొచ్చు. ముఖ్యంగా కాళ్లు, చేతులు, ముఖానికి రాసుకోవడం వల్ల చర్మం కమిలిపోకుండా ఉంటుంది.

* ప్రయాణాల్లో బయట ఆహారం తీసుకోకపోవడం ఉత్తమం. ఈ కాలంలో త్వరగా చెడిపోతుంది. వాటిని తీసుకోవడం వల్ల గ్యాస్ట్రో సమస్యల బారిన పడే ప్రమాదం ఉంటుంది. ఇంట్లో తయారు చేసిన ఆహారాన్ని తీసుకెళ్లాలి. పండ్లు, తేలికపాటి పదార్థాలు తీసుకోవడం ఉత్తమం.

* వాంతులు, వీరేచనాలు, శరీరం తీవ్రంగా వేడెక్కడం, నాలుగైదు గంటల వరకు మూత్రం రాకపోవడం, చర్మం వదులుగా మారడం, స్పృహ తప్పి పడిపోవడం లాంటి లక్షణాలు గుర్తిస్తే నిర్లక్ష్యం చేయకూడదు. వెంటనే సమీప ఆసుపత్రికి తరలించి చికిత్స అందించాలి.

* టైట్‌ జీన్స్‌, మందపాటి దుస్తులు ధరించకూడదు. వదులుగా ఉండే కాటన్‌ దుస్తులు మేలు.

ఈనాడు, హైదరాబాద్‌