విద్యలవాడలో విజ్ఞాన సౌరభం

పుస్తకాలను ఎంచుకుంటున్న పాఠకులు

గవర్నర్‌పేట, న్యూస్‌టుడే: మహాత్మాగాంధీరోడ్డులోని రామ్మోహన గ్రంథాలయంలో శుక్రవారం పుస్తక వితరణ కార్యక్రమం ప్రారంభించారు. పలువురు దాతలు, రచయితలు తమ వద్ద ఉన్న వందలాది పుస్తకాలను ప్రతి ఒక్కరూ వినియోగించుకోవాలన్న లక్ష్యంతో గ్రంథాలయానికి అందించారు. వీటిని శుక్రవారం ఇక్కడ అందుబాటులో ఉంచారు. ఇందులో విద్యా సంబంధమైన పుస్తకాలతోపాటు నవలలు, పిల్లల కథలు, ఆధ్యాత్మిక, వ్యక్తిత్వ వికాసం, వైద్యం, వాణిజ్య శాస్త్రం, వివిధ పోటీ పరీక్షలకు ఉపయోగపడేవి ఉన్నాయి. పుస్తక వితరణ కార్యక్రమాన్ని గ్రంథాలయ కమిటీ అధ్యక్షుడు చింతలపూడి కోటేశ్వరరావు ప్రారంభించారు. గ్రంథాలయ కార్యదర్శి వేములపల్లి కేశవరావు, ఉపాధ్యక్షుడు దమ్మాల రామచంద్రరావు పర్యవేక్షించారు. దాదాపు 200 మందికి పైగా పాఠకులు, విద్యార్థులు వచ్చి తమకు నచ్చిన పుస్తకాలను తీసుకు వెళ్లారు. ఉదయం 9 నుంచి సాయంత్రం 6 గంటల వరకు కొనసాగింది. శని, ఆదివారాల్లోనూ వితరణ కొనసాగనుంది.