అత్యాచార నిందితుడిపై బాధితురాలి బంధువుల దాడి

గుడివాడ గ్రామీణం, న్యూస్‌టుడే: యువతిపై అత్యాచారం చేశాడనే కారణంతో నిందితుడిపై బాధితురాలి బంధువులు దాడి చేసిన వైనం ఇది. స్థానికుల కథనం ప్రకారం గుడివాడ పట్టణానికి చెందిన ఓ యువతికి ఇటీవల పెళ్లి కుదిరింది. ఈ క్రమంలో ఆమె, కాబోయే భర్త ఈనెల 8న గుడివాడ రూరల్‌ మండలం బొమ్ములూరు గ్రామ శివారులోని మురికి కాలువ వద్దకు ఏకాంతంగా గడిపేందుకు వెళ్లారు. ఆ సమయంలో బొమ్ములూరు గ్రామానికి చెందిన ఇద్దరు వ్యక్తులు జంటలోని యువకుడిని కట్టి పడేసి అతని ముందే యువతిపై అత్యాచారానికి ఒడిగట్టారని సమాచారం. అయితే ఇది బయటకు వస్తే యువతి పెళ్లి ఆగిపోతుందనే భయంతో బాధితురాలి బంధువులు పోలీసులకు ఫిర్యాదు చేయలేదు. అప్పటి నుంచి వారు అత్యాచారానికి పాల్పడిన వారి కోసం గాలిస్తున్నారు. బుధవారం నిందితులైన యువకులు వారికి కన్పించారు. వారిని పట్టుకొనే ప్రయత్నంలో ఒకరు పరారైనట్లు చెబుతున్నారు. మరొకతను మాత్రం వారికి దొరికాడు. దీంతో యువతి బంధువులు అతడిని చితక బాదారు. స్థానికులు అతడిని ఏరియా ఆసుపత్రికి తరలించారు. అతను ఆసుపత్రిలో చికిత్స పొందుతున్నాడు. దీనికి సంబంధించి తమకు ఎలాంటి ఫిర్యాదు అందలేదని పోలీసులు చెబుతున్నారు.