కడతారా వీళ్లు.. కట్టబెడతారా ఇళ్లు!

నాలుగున్నరేళ్లుగా ఇటుక కూడా పెట్టలేదు
అయిదు పట్టణాల్లో టిడ్కో ఇళ్ల తీరు..
లబ్ధిదారులకు బ్యాంకుల నోటీసులు

ఉయ్యూరులో నిలిచిన టిడ్కో ఇళ్లు ఇవే..!

ఉమ్మడి కృష్ణా జిల్లాలో అయిదు పట్టణాల్లో.. 2019 ఆగస్టు తర్వాత.. టిడ్కో గృహ నిర్మాణాలకు సంబంధించి ఒక్క ఇటుక కూడా పేర్చలేదు. తెదేపా హయాంలో నిర్మాణం ప్రారంభించి... అసంపూర్తిగా నిలిచిన ఈ భవనాల్లో పిచ్చిమొక్కలు పెరుగుతున్నాయి. ఈ అయిదు పట్టణాల లబ్ధిదారులు .. అసలు నిర్మాణం పూర్తి చేస్తారా? లేదా? తమకు ఇళ్లు కేటాయిస్తారా లేదా..? అని వాపోతున్నారు.

ఈనాడు, అమరావతి

గుడివాడలో ఆఘమేఘాల మీద పూర్తి చేసిన టిడ్కో గృహాలను సీఎం జగన్‌ ప్రారంభించారు. మొత్తం 8,912 గృహాల నిర్మాణం చేపట్టారు. దాదాపు నాలుగు నెలలు గడిచినా.. ఇప్పటికి ఆ గృహాల్లో కేవలం పదుల సంఖ్యలోనే ఆవాసం ఉంటున్నారు. మిగిలిన గృహాలన్నింటికీ తాళాలు వేశారు. కారణం మంచినీటి సౌకర్యం లేదనేది లబ్ధిదారుల మాట. ఇక్కడ నీటిని సరఫరా చేసే ఈఎల్‌ఎస్‌ఆర్‌ వాటర్‌ ట్యాంకు నిర్మాణం పూర్తి కాలేదు. దీంతో లబ్ధిదారులు ముందుకు రావడం లేదు. మరోవైపు వాయిదా చెల్లించాలని.. బ్యాంకుల నుంచి ఒత్తిడి పెరుగుతోందని లబ్ధిదారులు వాపోతున్నారు.

బిల్లులు చెల్లిస్తేనే..!

ఉమ్మడి జిల్లాలో జగ్గయ్యపేట, నందిగామ, తిరువూరు, నూజివీడు, ఉయ్యూరు పట్టణాలకు మంజూరైన టిడ్కో గృహాలు తెదేపా ప్రభుత్వం మారిన తర్వాత ఒక్క ఇటుక పెట్టలేదు. వీటిని ప్రముఖ నిర్మాణ సంస్థ ఎల్‌అండ్‌టీ చేపట్టింది. ప్రభుత్వం రివర్స్‌ టెండరింగ్‌ పేరుతో కొంతకాలం మౌఖిక ఆదేశాలతో కాలం గడిపింది. తర్వాత నిర్మాణానికి అనుమతి ఇచ్చినా బిల్లులు చెల్లించలేదు. దీంతో ఈ అయిదు స్థానిక సంస్థల పరిధిలోని టిడ్కో ఇళ్ల నిర్మాణం పూర్తిగా ఆగింది. ఈ భవనాలు పిచ్చిమొక్కలతో నిండిపోయాయి. కొన్ని కిటికీలు దొంగలు తస్కరించారు. ఇనుము దొంగతనానికి గురైంది. ఇటీవల గుత్త సంస్థలకు నోటీసులిచ్చి నిర్మాణం ప్రారంభించాలని ఆదేశించారు. కొంతమొత్తం బిల్లులు చెల్లించడంతో తిరిగి నిర్మాణం ప్రారంభించాలని ఒత్తిడి చేస్తున్నారు.

• విజయవాడలో మొత్తం ఇళ్లలో 2,490 ఇళ్లను 90 శాతం పూర్తి చేశారు. ఇక్కడ ఎన్‌సీసీ నిర్మాణం చేపట్టింది. ఇటీవల వరకు పనులు ఆపేసింది. తర్వాత అధికారుల సూచనలతో కొంత బిల్లులు చెల్లించాక మళ్లీ పనులు ప్రారంభించారని చెబుతున్నారు. ఎప్పటికి పూర్తవుతాయో తెలియని పరిస్థితి.
• ఒక్క గుడివాడ, మచిలీపట్నం పైనే అధికారులు దృష్టి కేంద్రీకరించారు. ఇక్కడ గతంలో మంత్రులుగా పనిచేసిన కొడాలి నాని, పేర్ని నాని ప్రాతినిధ్యం వహిస్తున్నారు. మచిలీపట్నంలో 2,304 గృహాలకు 1,264 మాత్రమే పూర్తయ్యాయి. ఇంకా వెయ్యి వరకు పూర్తి చేయాల్సి ఉంది. నిర్మాణం ఒక ఎత్తయితే.. వసతుల కల్పన మరో ఎత్తుగా మారిందని అధికారులు చెబుతున్నారు.

రుణం ఇవ్వకున్నా వడ్డీ కట్టాలట...

బ్యాంకర్లు పూర్తి స్థాయిలో రుణం మంజూరు చేయకున్నా.. వడ్డీలు చెల్లించాలని నోటీసులు ఇస్తున్నారు. జిల్లాలో మూడు రకాల గృహాలను 300, 365, 430 చదరపు అడుగుల విస్తీర్ణం ఉన్న ప్లాట్లు నిర్మిస్తున్నారు. ప్రస్తుతం 19,376 పూర్తి చేస్తారు. మొదటి రకం లబ్ధిదారుని వాటా రూ.1. కేంద్రం, రాష్ట్రం రూ.3 లక్షల వరకు సబ్సిడీ ఇస్తుంది. రెండో రకానికి రూ.25 వేలు, మూడో రకానికి రూ.50 వేలు లబ్ధిదారు వాటా నిర్ణయించారు. బ్యాంకు రుణం రూ.3.15 లక్షలు, రూ.3.65 లక్షలు ఇవ్వాలని నిర్ణయించారు. దీనికి అదనంగా కేంద్రం నుంచి రూ.1.50 లక్షలు ప్రధానమంత్రి ఆవాస్‌ యోజన కింద అందుతుంది. రాష్ట్రం నుంచి అంతే మొత్తం ఇవ్వాలి. విజయవాడలో 6,576, గుడివాడలో 8,912 గృహాలను నిర్మిస్తున్నారు. గుడివాడలో 100 శాతం నిర్మాణాలు పూర్తయ్యాయి.

నోటీసులు వస్తున్నాయండి...

జిల్లాలో బ్యాంకులు మొత్తం రూ.679.70 కోట్లు రుణమిస్తేనే 19,376 ఇళ్ల నిర్మాణం పూర్తవుతుంది. ఇప్పటికి రూ.348 కోట్లు ఇచ్చాయి. ప్రస్తుతం వీటికి వడ్డీ వసూలు చేయడం చర్చనీయాంశమైంది. పురపాలక సంఘాల ఆధ్వర్యంలో రిజిస్ట్రేషన్‌ పూర్తవగా.. లబ్ధిదారులకు నోటీసులు అందుతున్నాయి. వీరందరినీ ఇప్పుడు కిస్తీలు కట్టాలని బ్యాంకులు ఒత్తిడి చేస్తున్నాయి. తిరువూరులో 384 గృహాలే ఉన్నాయి. లబ్ధిదారుల నుంచి కిస్తీలు కట్టాలని ఒత్తిడి చేసి మరీ వసూలు చేశారు. ముందుగా మెప్మా ఆధ్వర్యంలో త్రైపాక్షిక ఒప్పందం బ్యాంకులు, లబ్ధిదారుడు, యూఎల్‌బీ మధ్య కుదురుతోంది. దీని ప్రకారం రుణం మంజూరు చేస్తున్నారు. తర్వాత ఆ ఇంటిని లబ్ధిదారుల పేరుమీద రిజిస్ట్రేషన్లు చేసి బ్యాంకులు తనఖా పెట్టుకుంటున్నాయి. విజయవాడలో పలువురికి నోటీసులు అందాయి. వీటిపై బ్యాంకుల్లో ఆరా తీస్తే.. పట్టించుకోవద్దని సమాధానం ఇస్తున్నారు. ఒకవైపు నోటీసులు ఇస్తూ.. మరోవైపు పట్టించుకోవద్దంటే ఎలాగని కార్పొరేటర్‌ ప్రసాద్‌ ధ్వజమెత్తారు. అసలు నిర్మాణం పూర్తి చేయకండా నోటీసులు ఏంటని ప్రశ్నిస్తున్నారు.

కృష్ణా జిల్లా పరిధిలో రూ.357 కోట్లకు రూ.233 కోట్లు రుణం బ్యాంకులు అందించాయి. వీటిలో రూ.180 కోట్లు వరకు గుడివాడకే ఇచ్చారు. ఇంకా రూ.124 కోట్లు అందాలి. ఎన్టీఆర్‌ జిల్లా పరిధిలో రూ.262 కోట్లు మంజూరు రూ.95 కోట్లే విడుదల చేశాయి. ఇంకా రూ.167 కోట్లు అందాల్సి ఉంది. నూజివీడు పట్టణానికి రూ.60.50 కోట్లకు రూ.20 కోట్లు విడుదలయ్యాయి. ఇంకా రూ.40 కోట్లు అందాల్సి ఉందని టిడ్కో ఈఈ చిన్నోడు ‘ఈనాడు’తో చెప్పారు.