సుందర దీవి... కానరాదే ఠీవి?

కొబ్బరి చెట్లతో ఆహ్లాదకరంగా...

కేరళ తరహా పచ్చని చెట్లు... గోవాను తలపించే సముద్ర తీరం.. ఆహ్లాదకర, ఆరోగ్యకరమైన వాతావరణంతో ఎటు చూసినా ప్రకృతి కమనీయ దృశ్యాలతో కట్టిపడేస్తూ మూడు వైపులా ఉప్పుటేరు, ఒకవైపు సముద్రంతో ఉన్న ఈ సుందర దీవి ఎక్కడ అనుకుంటున్నారా.. కృష్ణా జిల్లా కృత్తివెన్ను మండలంలోని చినగొల్లపాలెం దీవి. భీమవరానికి సమీపంలో ఉంది. చుట్టూ సముద్రం ఉన్నా ఎక్కడ చూసినా మంచి నీరు ఊరడం ఈ దీవి ప్రత్యేకత. బోటింగ్‌తో పాటు ఇతర వసతులు కల్పించి అందరినీ ఆకర్షించేలా పర్యాటకంగా అభివృద్ధి చేస్తామని పాలకులు చెప్పడమే కానీ పట్టించుకున్న దాఖలాలు లేవు. ఇంతటి ప్రాధాన్యతగల దీవి క్రమేపీ కోతకు గురవడంతో స్థానికులు ఆందోళన చెందుతున్నారు. ఏ ఏటికాయేడు సముద్రపు కోత కారణంగా కొంతకొంతగా దీవి తరిగిపోతూ వస్తోంది. ఇప్పటికే కొబ్బరి, సరుగుడు తదితర తోటలను సముద్రం తనలో కలిపేసుకుంది. కృష్ణా, పశ్చిమగోదావరి జిల్లాల మధ్య ఆహ్లాదకరంగా ఉండే ఈ ప్రాంతాన్ని, ఈ దీవిని కాపాడుకోవడానికి ఇప్పటికైనా స్పందించకపోతే మున్ముందు కడలి గర్భంలో కలిసిపోయి కనుమరుగయ్యే ప్రమాదం ఉంది. ఇక్కడ వ్యవసాయ భూములు కూడా కడలిలో కలసిపోతుండడంతో ఈ ఊరి ప్రజలు వలస వెళ్లిపోతున్నారు. భవిష్యత్తులో ఈ ఊరు ఉంటుందనే నమ్మకం లేక  ఇక్కడ ఉండడానికి ఎవరూ ఇష్ట పడకపోవడంతో త్వరతో ఈ దీవి ఖాళీ అయిపోయే ప్రమాదం ఉంది. పాలకులు పట్టించుకుని ఈ దీవి కోతకు గురవ్వకుండా చుట్టూ రక్షణ చర్యలు తీసుకుని, సుందరమైన పర్యాటక కేంద్రంగా తీర్చిదిద్ది బోటింగ్‌ పాయింట్లు అభివృద్ధి చేయాలని కోరుతున్నారు.

చిన్నగొల్లపాలెంలో హరిత సోయగం

ఈనాడు, అమరావతి