Andhra News: పవన్‌ పర్యటనతో ప్రభుత్వానికి కనువిప్పు కలగాలి: నాదెండ్ల మనోహర్‌

విజయవాడ: ఆంధ్రప్రదేశ్‌లో కౌలు రైతులను రాష్ట్ర ప్రభుత్వం పట్టించుకోవడం లేదని జనసేన రాజకీయ వ్యవహారాల కమిటీ ఛైర్మన్‌ నాదెండ్ల మనోహర్‌ ఆరోపించారు. కౌలు రైతుల ఆత్మహత్యలపై మూడేళ్ల క్రితం చట్టం చేశారన్నారు. ప్రభుత్వం జారీ చేసిన జీవో ప్రకారం ఆత్మహత్య చేసుకున్న కౌలు రైతుల కుటుంబాలకు రూ.7 లక్షలు పరిహారం ఇవ్వాలని.. కానీ ప్రభుత్వం మాత్రం రూ.లక్ష ఇచ్చి చేతులు దులిపేసుకుంటోందని ఆగ్రహం వ్యక్తం చేశారు. ఆత్మహత్యలు చేసుకున్న వారికి రాష్ట్ర ప్రభుత్వం నుంచి ఎలాంటి భరోసా అందడం లేదన్నారు. జనసేన తరఫున రాష్ట్రంలోని వెయ్యి మంది కౌలురౌతు కుటుంబాలను ఆదుకోనున్నట్లు నాదెండ్ల చెప్పారు. ఆత్మహత్యలు చేసుకున్న కౌలు రైతుల కుటుంబాలకు ఆర్థిక సాయం అందించి వారిలో ధైర్యం నింపడానికి తలపెట్టిన ‘కౌలు రైతుల భరోసా’ యాత్రను అనంతపురం జిల్లాలో పవన్ కల్యాణ్ మంగళవారం ప్రారంభించనున్న విషయం తెలిసిందే. ఈ పర్యటనతో జగన్‌ ప్రభుత్వానికి కనువిప్పు కలగాలని పేర్కొన్నారు. అనంతపురంలో 28 మంది కౌలురైతు కుటుంబాలకు పవన్‌ ఆర్థిక సాయం అందించనున్నట్లు నాదెండ్ల వెల్లడించారు.