పల్లెల్లో పాల ప్రగతి 

గడ్డి తెస్తున్న మహిళలు

రాజుపాలెం, న్యూస్‌టుడే : గ్రామీణ ప్రాంతాల్లో వ్యవసాయం తరువాత ప్రధాన జీవనాధారమైన పాడి పరిశ్రమపై రైతులు ప్రత్యేక దృష్టి సారించారు. గతంలో మాగాణి భూములున్న గ్రామాల్లోనే అధికంగా పాల ఉత్పత్తి జరిగేది. వాణిజ్య పంటలు సాగు చేస్తున్న వారికి ప్రకృతి సహకరించకపోవడంతో ఈ ఏడాది ఆయా గ్రామాల్లోనూ గేదెల పెంపకం గణనీయంగా పెరిగింది. మహిళలు పాల విక్రయం ద్వారా ఆర్థిక స్వాలంబన పొందుతూ కుటుంబానికి అండగా నిలుస్తుండటంతో పల్లెలు పాల ప్రగతిని సాధిస్తున్నాయి. జిల్లా వ్యాప్తంగా గత ఏడాది రోజుకు రెండు లక్షల లీటర్ల పాల ఉత్పత్తి జరగ్గా, ఈ ఏడాది మూడు లక్షలకు చేరుకోవడంతో నలభై శాతం పాల దిగుబడి పెరిగింది పదేళ్ల క్రితం గ్రామాల్లో పశువుల మేత కొరత ఉండగా, ప్రస్తుతం వారు సాగు చేసే విస్తీర్ణంలో కొంత భాగాన్ని పశుగ్రాసం కోసం కేటాయిస్తున్నారు.

జామ రైతు వినూత్న యోచన

కాయలు స్వయంగా అమ్ముతున్న రైతు వెంకటరామిరెడ్డి

ఫిరంగిపురం మండలం మేరికపూడి గ్రామానికి చెందిన రైతు వాసిపల్లి వెంకటరామిరెడ్డి మూడేళ్ల క్రితం 1.5 ఎకరాల్లో తైవాన్‌ జామ సాగుకు ఉపక్రమించారు. ఒక్కో మొక్క రూ.35 చొప్పున కడియంలో కొనుగోలు చేశారు. ఎకరానికి వెయ్యి మొక్కలు నాటగా, రూ.50 వేలు పెట్టుబడి పెట్టారు. ఆరు నెలలకు కాయలు వచ్చాయి. ఏటా రెండు కాపులు రావడంతో సగటున 15 టన్నుల దిగుబడి వచ్చింది. మార్కెట్‌కు తీసుకెళ్తే ధర తక్కువగా అడుగుతున్నారని పొలం పక్కనే ఉన్న ప్రధాన రోడ్డుపై పెట్టి విక్రయించడం మొదలుపెట్టారు. మార్కెట్‌లో కిలో రూ.20 నుంచి రూ.30కు సరకు అడుగుతున్నారు. రోడ్డు పక్కన కిలో రూ.40 నుంచి రూ.50 వరకు విక్రయిస్తున్నారు. దళారుల ప్రమేయం లేకపోవడంతో లాభం పెరిగిందని రైతు తెలిపారు. ఎకరానికి ఏటా రూ.లక్షకు పైగా లాభం వచ్చిందని చెప్పారు.

- న్యూస్‌టుడే,  ఫిరంగిపురం గ్రామీణం

తక్కువ ఖర్చుతో అధిక రాబడి

కౌలు సాగు కలిసి రాకపోవడంతో పాడి పరిశ్రమపై దృష్టి సారించి బలుసుపాడుకు చెందిన చిన్నం కోటేశ్వరమ్మ జీవనం సాగిస్తున్నారు. మూడేళ్ల క్రితం రూ.లక్షతో రెండు గేదెలు కొనుగోలు చేశారు. రోజుకు ఎనిమిది నుంచి పది లీటర్ల వరకు పాలు ఇంటి చుట్టు పక్కల వారికి, కేంద్రాలకు విక్రయిస్తారు. ఏడాదికి రూ.1.5 లక్షల ఆదాయం సమకూరుతోంది. ఇద్దరు పిల్లల్ని ఉన్నత చదువులు చదివిస్తున్నారు.

పాడే జీవనాధారం

పెదకూరపాడుకు చెందిన గోగులపాటి సంతోషం రైతుకూలీ. ఇటీవల ఆమె భర్త అనారోగ్యంతో కన్నుమూశారు. తెలిసిన వారి వద్ద రుణం తీసుకుని నాలుగు గేదెలు కొనుగోలు చేశారు. వాటిలో రెండు గేదెల ద్వారా రోజుకు 18 లీటర్ల పాలు కేంద్రాలకు సరఫరా చేస్తున్నారు. నెలకు ఖర్ఛులు పోగా రూ.15 వేలు ఆదాయం సమకూరుతోంది.

నెల ఆదాయం రూ.60 వేలు

రామిరెడ్డిపేటకు చెందిన బిజ్జం బాలచౌడేశ్వరి కుటుంబానికి పరిశ్రమమే ఆధారం తొలుత ఐదు గేదెలు తీసుకున్నారు. అన్ని ఖర్చులు పోగా రాబడి సంతృప్తిగా ఉండటంతో మరో ఎనిమిది కొనుగోలు చేశారు. రోజుకు సుమారు 70 లీటర్ల పాలు విక్రయిస్తున్నారు.ఖర్చులు పోగా నెలకు రూ.60 వేల వరకు ఆదాయాన్ని పొందుతున్నారు.

తమలపాకు తోటల్లో తెగుళ్ల నివారణ