బ్యాంకు ఉద్యోగికి ఆన్‌లైన్‌ మోసగాళ్ల టోకరా

పెనమలూరు, న్యూస్‌టుడే: బ్యాంకు ఉద్యోగికి ఆన్‌లైన్‌ మోసగాళ్లు రూ.91 వేలకు టోకరా పెట్టారు. పెనమలూరు పోలీసుల కథనం ప్రకారం.. వి.వంశీకృష్ణ చిత్తూరు జిల్లా మదనపల్లెలోని ఓ బ్యాంకులో ఉద్యోగి. అతని ఫోన్‌ నంబరుతో అనుసంధానమై ఉన్న క్రెడిట్‌ కార్డును విజయవాడ సమీప కానూరులో నివసించే తల్లి మల్లేశ్వరి వినియోగిస్తుంటారు. రెండ్రోజుల క్రితం వంశీకృష్ణకు ఓ వ్యక్తి ఫోన్‌ చేసి క్రెడిట్‌ కార్డు లిమిట్‌ను పెంచుతామని, ఫోన్‌కు వచ్చిన ఓటీపీ సంఖ్యను చెప్పాలని కోరాడు. దీంతో అతడు ఆ సంఖ్యను తెలపాల్సిందిగా తల్లిని కోరడంతో ఆమె ఆ వ్యక్తికి చెప్పింది. అనంతరం క్షణాల్లో ఈ కార్డును వినియోగించడం ద్వారా రూ. 91 వేలు డ్రా అయినట్లు మెసేజ్‌ వచ్చింది. మోసపోయినట్లు గుర్తించిన ఈమె కుమారుడికి విషయాన్ని వివరించింది. బాధితురాలి ఫిర్యాదు మేరకు పెనమలూరు పోలీసులు కేసు నమోదు చేసి దర్యాప్తు చేస్తున్నారు.