Suicide: అపార్ట్‌మెంట్‌ పైనుంచి దూకి యువతి బలవన్మరణం

మృతిచెందిన సుభాషిణి

చిలకలూరిపేట గ్రామీణ, న్యూస్‌టుడే: చిలకలూరిపేట రైతుబజారు ఎదురుగా గాంధీపేటలో ఉన్న ఓ అపార్ట్‌మెంట్‌ పైనుంచి ఆదివారం ఉదయం ఓ యువతి దూకి ఆత్మహత్య చేసుకుంది. పోలీసుల కథనం ప్రకారం.. పట్టణానికి చెందిన ప్రముఖ ఆడిటర్‌ అన్నదాత కుమార్తె సుభాషిణి (30) కొంతకాలంగా అనారోగ్యంతో బాధపడుతోంది. ఈ క్రమంలోనే ఆదివారం ఉదయం సుబ్బయ్యతోటలో ఉన్న ఇంటి నుంచి గాంధీపేటలోని అపార్ట్‌మెంట్‌ వద్దకు వచ్చింది. 5వ ఫ్లోర్‌లో వారి ఫ్లాటు ఉంది. ఈ క్రమంలోనే యువతి పైనుంచి దూకింది. ఆమె ఇనుపగేటుపై పడడంతో తలకు తీవ్రగాయాలయ్యాయి. స్థానికులు వెంటనే ఆసుపత్రికి తరలించగా అప్పటికే సుభాషిణి మృతిచెందినట్లు వైద్యులు తెలిపారు. అర్బన్‌ ఎస్సై మోహన్‌ సంఘటనా స్థలాన్ని పరిశీలించారు. ఆసుపత్రి వద్ద మృతదేహాన్ని మాజీమంత్రి ప్రత్తిపాటి పుల్లారావు సందర్శించి నివాళి అర్పించారు. అన్నదాత కుటుంబ సభ్యులను ఓదార్చారు.