కారు ఢీకొని ఆటో చోదకుడి దుర్మరణం

జ్ఞానపాల్‌ (పాత చిత్రం)

తాడికొండ, న్యూస్‌టుడే: ఆటోను కారు ఢీ కొట్టిన ఘటనలో చికిత్స పొందుతూ ఆటో చోదకుడు మృతి చెందిన ఘటన శుక్రవారం చోటుచేసుకుంది. పోలీసుల కథనం.. తుళ్లూరు మండలం నేలపాడు గ్రామానికి చెందిన బక్కా జ్ఞానపాల్‌ (38) ఆటో నడుపుతుంటారు. శుక్రవారం ఉదయం నేలపాడు నుంచి కూలీలను తీసుకొని మండలంలోని లాం గ్రామానికి వచ్చారు.కాసేపటికి తిరిగి ఇద్దరు ప్రయాణికులను ఎక్కించుకొని బయలుదేరారు. పెద్దపరిమి రోడ్డులోని భ్రమరా టౌన్‌షిఫ్‌ వద్దకు చేరుకుంటుండగా అదే సమయంలో ఎదురుగా వస్తున్న కారు ఆటోను ఢీకొంది. దీంతో ఆటో పల్టీ కొట్టింది. అందులో ఉన్న ఇద్దరు ప్రయాణికులకు స్వల్ప గాయాలవగా, జ్ఞానపాల్‌కు తీవ్రంగా గాయపడ్డారు. స్పందించిన స్థానికులు 108 వాహనంలో చికిత్స నిమిత్తం గుంటూరు ప్రభుత్వ ఆస్పత్రికి తరలించారు. అక్కడ జ్ఞానపాల్‌ మరణించారు. ఆయనకు భార్య, ఇద్దరు కుమారులున్నారు. మృతుడి కుటుంబ సభ్యుల ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు పోలీసులు వెల్లడించారు.