గుంటూరు నగర కమిషనర్‌ అనురాధ బదిలీ

ఈనాడు-అమరావతి: గుంటూరు నగరపాలకసంస్థ కమిషనర్‌ చల్లా అనురాధను ఆంధ్రప్రదేశ్‌ వైద్యసేవలు, మౌలిక సదుపాయాల అభివృద్ధి సంస్థ ఎగ్జిక్యూటివ్‌ డైరెక్టర్‌(ఈడీ)గా ప్రభుత్వం బదిలీ చేసింది. చల్లా అనురాధ స్థానంలో కమిషనర్‌గా ఇంకా ఎవరినీ నియమించలేదు. గుంటూరు నగరపాలకసంస్థ కమిషనర్‌గా అనురాధ బాధ్యతలు చేపట్టేనాటికి వార్డు సచివాలయాల వ్యవస్థ తొలిదశలో ఉంది. సచివాలయాలను ఏర్పాటుతోపాటు సేవలను ప్రజలకు చేరువ చేయడంలో కృషిచేశారు. గుంటూరు నగరంపై పూర్తిస్థాయిలో అవగాహన ఉండటం, గతంలో ఇక్కడ పనిచేసి ఉండటంతో కరోనా తొలి, రెండోదశలను సమర్థంగా ఎదుర్కొని యంత్రాంగాన్ని ముందుకు నడిపించారు. నగరంలో పోగుపడుతున్న వృథా ప్లాస్టిక్‌ను సేకరించి దాని నుంచి బయోడీజిల్‌ తీసే ప్రాజెక్టును చేపట్టారు. అందుబాటులో ఉన్న నిధులతో అవసరమైన నిర్మాణ పనులు చేపట్టి ప్రజలకు ఇబ్బందులు లేకుండా సమన్వయం చేయగలిగారు. గుంటూరు నగరపాలక సంస్థకు జరిగిన ఎన్నికలను విజయవంతంగా పూర్తిచేశారు. ప్రత్యేకాధికారుల పాలనలోనూ సమన్వయంతో ఇబ్బందులు లేకుండా పాలన కొనసాగించారు. డయల్‌ యువర్‌ కమిషనర్‌, స్పందన కార్యక్రమాల ద్వారా ప్రజా సమస్యల పరిష్కారానికి చొరవ చూపారు. అనురాధ స్థానంలో ఐఏఎస్‌ను కమిషనర్‌గా నియమిస్తారని చర్చ జరుగుతోంది.