పీహెచ్‌డీ కోర్సు పేరుతో మోసం

కృష్ణలంక, న్యూస్‌టుడే: పీహెచ్‌డీ కోర్సులో చేరుస్తామని మోసానికి పాల్పడిన ఓ కన్సెల్టెన్సీపై కృష్ణలంక పోలీసులు కేసు నమోదు చేశారు. మచిలీపట్నానికి చెందిన వి.వెంకటరమణ కుమారుడు పాండురంగారావు పీహెచ్‌డీ కోర్సుకు సంబంధించి గతేడాది జూన్‌లో లబ్బీపేటలోని తేజ ఎడ్యుకేషనల్‌ కన్సల్టెన్సీని సంప్రదించారు. ఈక్రమంలో సంస్థ నిర్వాహకురాలు కలపాల నీలవేణి హైదరాబాద్‌లో తనకు తెలిసిన సురేష్‌ ద్వారా కాన్పూర్‌లోని ఛత్రపతి షాబూజీ మహరాజ్‌ విశ్వవిద్యాలయంలో అడ్మిషన్‌ను ఇప్పిస్తామని చెప్పి, వారి నుంచి రూ.1.50 లక్షలు తీసుకున్నారు. అనంతరం యూనివర్సిటీ నుంచి వచ్చినట్లు అడ్మిషన్‌ లెటర్‌, ఐడీ కార్డులను పంపించారు. వాటిని పరిశీలించగా అవి నకిలీవని తేలింది. దీంతో తాము మోససోయామని గ్రహించిన వెంకట రమణ గురువారం పోలీసులకు ఫిర్యాదు చేశారు.