విదేశాల నుంచి వచ్చిన వారిలో ముగ్గురికి కరోనా

గుంటూరు వైద్యం, న్యూస్‌టుడే: విదేశాల నుంచి వచ్చిన వారికి ఆర్‌టీపీసీఆర్‌ పరీక్ష చేయగా గురువారం ముగ్గురికి కొవిడ్‌ పాజిటివ్‌గా తేలింది. తెనాలి పీపీయూనిట్‌ సాలిపేట పరిధిలో ఉన్న వారిని గుర్తించి పరీక్షలు చేశారు. దీంతో వారి నమూనాలను జన్యు విశ్లేషణ కోసం హైదరాబాద్‌లోని సీసీఎంబీ ప్రయోగశాలకు వెంటనే పంపినట్లు అధికారులు చెప్పారు.

ఇతర దేశాల నుంచి 77 మంది రాక : ఇతర దేశాల నుంచి గురువారం జిల్లాకు 77 మంది వచ్చారు. వారందరినీ గుర్తించి ఆర్‌టీపీసీఆర్‌ పరీక్షలు చేసేందుకు వైద్య ఆరోగ్య శాఖ అధికారులు అవసరమైన ఏర్పాట్లు చేశారు. విదేశాల నుంచి వచ్చిన వారిలో ఇప్పటి వరకు 5,851 మందికి పరీక్షలు నిర్వహించగా 27 మందికి కొవిడ్‌ పాజిటివ్‌ రిపోర్టు వచ్చినట్లు వైద్యులు ప్రకటించారు. వారికి సన్నిహితంగా మెలిగిన వారిలో ఏడుగురికి కరోనా వైరస్‌ నిర్ధారణ జరిగింది. ఇప్పటి వరకు 12 మందికి కరోనా కొత్త వేరియంట్‌ ఒమిక్రాన్‌ సోకినట్లు వైద్య ఆరోగ్య శాఖ అధికారులు వెల్లడించారు.