Ap News: ఏపీఎస్‌ఆర్టీసీకి సంక్రాంతి ఆదాయం రూ.144 కోట్లు

అమరావతి: సంక్రాంతి పండుగకు ఏపీఎస్ఆర్టీసీకి రూ.144 కోట్ల ఆదాయం వచ్చినట్లు ఆర్టీసీ ఎండీ ద్వారకా తిరుమలరావు తెలిపారు. ఈ నెల 7 నుంచి 18 వరకు తెలుగు రాష్ట్రాలు సహా ఇతర ప్రాంతాలకు మొత్తంగా 5,422 ప్రత్యేక బస్సులు ఆర్టీసీ నడిపిందన్నారు. వీటిలో ఏపీ నుంచి హైదరాబాద్‌కే 1,350 బస్సులు నడిపినట్లు తెలిపారు. జనవరి 17వ తేదీన ఒక్కరోజే ఆర్టీసీకి రూ. 15.40 కోట్ల ఆదాయం సమకూరిందన్నారు. ఆ రోజున అత్యధిక సంఖ్యలో 36 లక్షల మంది ఆర్టీసీ బస్సుల్లో ప్రయాణం చేసినట్లు చెప్పారు.  కొవిడ్ ఉద్ధృతి కారణంగా ఈ సారి చెన్నై, బెంగళూరు నుంచి ప్రయాణికుల సంఖ్య భారీగా తగ్గిందన్నారు. ఆర్టీసీని ఆదరించిన ప్రయాణికులకు ఈ సందర్భంగా ఆర్టీసీ ఎండీ ద్వారకా తిరుమలరావు ధన్యవాదాలు తెలిపారు.