డ్రైవింగ్‌ పాఠశాలకు రూ.42 లక్షల నిధులు

హనుమాన్‌జంక్షన్‌, న్యూస్‌టుడే: బాపులపాడు మండలం అంపాపురంలో కృష్ణా జిల్లా లారీ యజమానుల సంఘం ఆధ్వర్యంలో నిర్వహిస్తున్న అధునాతన డ్రైవింగ్‌ పాఠశాలకు రాజ్యసభ సభ్యుడు కనకమేడల రవీంద్రకుమార్‌ రూ.42,77,500 నిధులు కేటాయించారు. శిక్షణ పూర్తి చేసుకున్న చోదకులకు ధ్రువ పత్రాలు అందజేయడం కోసం ఎంపీ ఇటీవల పాఠశాలకు వచ్చారు. ఈ సందర్భంగా లారీ యజమానుల సంఘం నాయకులు, హెవీ మోటారు వెహికల్‌ సిములేటర్‌ ఏర్పాటు కోసం ఎప్పట్నుంచో కృషి చేస్తున్నామని, దీనికి సహకరించాలని విజ్ఞప్తి చేశారు. స్పందించిన ఆయన దీనికి అవసరమైన నిధుల్ని తన కోటా నుంచి కేటాయిస్తున్నట్లు ప్రకటించారు. ఇందుకనుగుణంగా అవసరమైన మంజూరు పత్రాలు కూడా రవీంద్రకుమార్‌ జారీ చేసినట్లు సంఘం నాయకులు తుమ్మల లక్ష్మణస్వామి, గోపిశెట్టి వీరవెంకయ్య, వై.వి.ఈశ్వరరావు, ప్రిన్సిపల్‌ రాజారావు తెలిపారు.