పట్టణాల్లో వైరస్‌ తీవ్రత

గుంటూరు, మంగళగిరి, నరసరావుపేటలోనే సగం కేసులు
జనసంచారం అధికంగా ఉండడమే కారణమన్న వైద్యులు
ఈనాడు-అమరావతి

జిల్లాలో కరోనా కేసులు పట్టణాల్లోనే అధికంగా వస్తున్నాయి. జిల్లా కేంద్రం గుంటూరులో వారం రోజుల నుంచి పరిశీలిస్తే సగటున రోజుకు 400 చొప్పున వస్తుండగా నరసరావుపేట, మంగళగిరిలో వందేసి కేసులు నమోదవుతున్నాయి. మొత్తం కేసుల్లో సగం కేసులు ఈమూడు పట్టణాల్లోనే ఉంటున్నాయని వైద్య, ఆరోగ్యశాఖ వర్గాలు గుర్తించాయి. సోమవారం జిల్లా వ్యాప్తంగా 846 కేసులురాగా ఒక్క గుంటూరులోనే 420 కేసులొచ్చాయి. పట్టణాల్లో జనసంచారం ఎక్కువగా ఉండటం, భౌతిక దూరం పాటించకపోవటం, అత్యధిక పాఠశాలలు, కళాశాలలు ఇక్కడే ఉండటంతో రాకపోకలు సాగిస్తారు. హోటళ్లు, టీ కేఫ్‌లు వద్ద జనం కరోనా మరిచి బాగా గుమికూడుతున్నారు. వాణిజ్య, వర్తక కేంద్రాల్లో సైతం మాస్కు ధారణ వంటివి తక్కువగా ఉంటున్నాయి. మరోవైపు  ప్రభుత్వ కార్యాలయాలు పట్టణాల్లోనే ఎక్కువగా ఉండటంతో  జనసంచారం అధికంగా ఉంటోంది. రాత్రి 11 గంటల నుంచి తెల్లవారుజామున 5 గంటల వరకు అత్యవసరమైతే తప్ప బయటకు రావొద్దని హెచ్చరికలు చేస్తున్నా పెద్దగా అమలు కావడం లేదు. అనుమానిత లక్షణాలు కలిగిన వారు వెంటనే హోం ఐసోలేషన్‌కు వెళితే వ్యాప్తికి ఆస్కారం ఉండదని జీజీహెచ్‌ వైద్యుడు డాక్టర్‌ ఆర్‌.నాగేశ్వరరావు తెలిపారు.