నేడు ఈబీసీ నేస్తం నిధుల జమ

విజయవాడ సబ్‌కలెక్టరేట్‌, న్యూస్‌టుడే : ఈబీసీ నేస్తం పథకం కింద జిల్లాలో ఈబీసీ/ఓసీ కులాలకు చెందిన 45 నుంచి 60 సంవత్సరాల వయసు కలిగిన 30,913 మంది మహిళలు అర్హత పొందినట్టు కలెక్టర్‌ జె.నివాస్‌ సోమవారం ఓ ప్రకటనలో తెలిపారు. ఒక్కొక్క మహిళకు రూ.15 వేల చొప్పున మొత్తం రూ.46.37 కోట్ల మేర వారి ఖాతాల్లో ఈనెల 25వ తేదీ మంగళవారం జమ కానున్నట్టు పేర్కొన్నారు. ముఖ్యమంత్రి వై.ఎస్‌.జగన్‌మోహన్‌రెడ్డి చేతుల మీదుగా నిధుల విడుదల కార్యక్రమం ప్రారంభం అవుతుందన్నారు. గ్రామ/వార్డు వాలంటీర్ల ద్వారా అర్హత గల మహిళలను గుర్తించినట్టు వివరించారు. ఇది ఈబీసీ/ఓసీ కులాలకు చెందిన వారికి మాత్రమే వర్తిస్తుందని, ఎస్సీ, ఎస్టీ, బీసీ, మైనార్టీ, క్రైస్తవ, కాపు వర్గాలకు వర్తించదన్నారు.