సామాజిక మాధ్యమాల్లో చూసి.. చోరీలు చేసి..

పోలీసులకు చిక్కిన ఎనిమిదో తరగతి విద్యార్థులు

 నిందితుల నుంచి స్వాధీనం చేసుకున్న బంగారు ఆభరణాలను చూపిస్తున్న సీఐ
కనకారావు, ఎస్సై పండుదొర, సిబ్బంది

నందిగామ, న్యూస్‌టుడే: సామాజిక మాధ్యమాల్లో వీడియోలు చూసి చోరీలకు పాల్పడిన ఐదుగురు విద్యార్థులు నందిగామ పోలీసులకు చిక్కారు. మంగళవారం స్థానిక పోలీసుస్టేషన్లో సీఐ కనకరావు వెల్లడించిన వివరాల ప్రకారం... నందిగామలోని ఓ ప్రభుత్వ పాఠశాలలో చదువుతున్న ఐదుగురు ఎనిమిదో తరగతి విద్యార్థులు పాఠశాల సెలవు రోజుల్లో తాళాలు వేసిన ఇళ్లల్లో చోరీలకు పాల్పడుతున్నారు. చోరీలు ఎలా చేయాలి... పోలీసుల నుంచి ఎలా తప్పించుకోవాలనే విషయాలను అంతర్జాలంలో చూసి తెలుసుకున్నారు. ఈనెల 22న కాకానినగర్‌లోని నల్లాని శ్రీనివాసరావు ఇంట్లో బంగారు ఆభరణాలు చోరీకి గురయ్యాయి. ఆయన ఫిర్యాదు మేరకు కేసు నమోదు చేసిన పోలీసులు విచారణ చేపట్టారు. ఇంతలో మరో ఇంట్లో దొంగతనం చేస్తుండగా.. స్థానికులు పోలీసులకు సమాచారం ఇచ్చారు. విద్యార్థులను అదుపులోకి తీసుకున్న పోలీసులు వివరాలు రాబట్టారు. మొత్తం ఐదు ఇళ్ల తాళాలు పగలగొట్టి చోరీలు చేసినట్లు తేల్చారు. చోరీ చేసిన నగదును పంచుకున్నారు. ఒకరు రూ.పది వేలతో సెల్‌ఫోన్‌ కొన్నాడు. మిగిలినవారు చిరు తిండ్లు బాగా తిన్నారు. బంగారం గాజులు, ఉంగరాలను ఎలా అమ్మాలో తెలియక దాచిపెట్టారు. విద్యార్థుల నుంచి రూ.2,49,000 విలువ చేసే 4 బంగారం గాజులు, 3 ఉంగరాలు, వెండి పట్టీలు, 2 సెల్‌ఫోన్లు రికవరీ చేశారు. కేసు దర్యాప్తులో కీలకంగా వ్యవహరించిన కానిస్టేబుళ్లు ఆర్‌.నవీన్‌, పి.గోపాల్‌కు సీఐ కనకరావు రివార్డులు ఇచ్చి సత్కరించారు. ఎస్సై పండుదొర, ఏఎస్సై సామినేని నాగేశ్వరరావు పాల్గొన్నారు.