మహిళను దుర్భాషలాడిన ఎక్సైజ్‌ అధికారి

హిందూపురం పట్టణం, న్యూస్‌టుడే: హిందూపురం గ్రామీణ మండలం తూమకుంట చెక్‌పోస్ట్‌ బస్టాండ్‌ వద్ద ఓ ఎక్సైజ్‌ అధికారి శనివారం రాత్రి 7 గంటల సమయంలో ఓ మహిళను దుర్భాషలాడటం వివాదాస్పదంగా మారింది. బాధితురాలు పోలీసులకు చేసిన ఫిర్యాదు మేరకు వివరాలు.. పట్టణంలోని చాకలి కుంటకు చెందిన నాగమణి తూమకుంట పారిశ్రామిక వాడలో లాండ్రీ పెట్టుకున్నారు. దుస్తులను మూటకట్టుకొని పట్టణానికి రావడానికి రాత్రి 7 గంటల సమయంలో బస్సు కోసం వేచి చూస్తున్నారు. ఆ సమయంలో ఓ వ్యక్తి ద్విచక్ర వాహనంపై సివిల్‌ డ్రస్‌లో వచ్చి, తాను ఎక్సైజ్‌ అధికారి అని, మద్యం పాకెట్లు తీసుకెళ్తున్నావా అంటూ దుస్తులమూట విప్పాలని బూతులు తిట్టారని ఆమె కన్నీరు మున్నీరుగా విలపించారు. ఈ విషయమై, చెక్‌పోస్టు సీఐ చంద్రశేఖర్‌ను వివరణ కోరగా, అనుమానాస్పదంగా ఉండటంతో దుస్తుల మూట తనిఖీ చేశానని, దుర్భాష లాడలేదని పేర్కొన్నారు.