చిరువ్యాపారులపై చిర్రుబుర్రు..

వ్యాపారి ఏర్పాటు చేసుకున్న గొడుగును పైకి విసిరేస్తున్న కానిస్టేబుల్‌

ఫ్రెండ్లీ పోలీస్‌ అంటూ ఉన్నతాధికారులు కిందిస్థాయి సిబ్బందికి పదేపదే గుర్తు చేస్తున్నా కొందరి తీరు మారడం లేదు. చిరువ్యాపారులపై శుక్రవారం ఓ ట్రాఫిక్‌ కానిస్టేబుల్‌ విరుచుకుపడ్డారు. ఎటువంటి హెచ్చరికలు చేయకుండా చేతులకు, కాళ్లకు పనిచెప్పారు. నగరంలోని పాతూరులో సంక్రాంతి సందర్భంగా పండగ సమయాల్లో మామిడాకులు, పండ్లు, కాయలు అమ్ముకునే వారిపై హడావుడి చేశారు. మామిడాకుల సంచిని పడేసి, కింద ఉన్న ట్రేను కాలితో తన్నేశారు. అనంతరం తాడిపత్రి రోడ్డువైపు వెళ్లి నీడ కోసం ఏర్పాటు చేసుకున్న గొడుగును తీసి దుకాణాలపై విసిరేశారు. పోలీసులకు ఏర్పాటు చేసిన షెడ్డునీడలో కొందరు వృద్ధులు వేరుసెనగ, అరటి ఆకులు అమ్ముకుంటుండగా వారికి అడ్డుగా తన వాహనాన్ని నిలిపి ట్రాఫిక్‌ను పర్యవేక్షించారు. చిరువ్యాపారులపై ప్రతాపం చూపడమేంటని స్థానికులు ప్రశ్నించారు. - ఈనాడు: అనంతపురం