ప్రాణం తీసిన ఈత సరదా

యశ్వంత్‌ (దాచినచిత్రం)

రాయదుర్గం పట్టణం, న్యూస్‌టుడే: సరదా కోసం ఈతకు వెళ్లిన బాలుడు ప్రాణాలు కోల్పోయిన ఘటన పట్టణంలో చోటుచేసుకుంది. బంధువులు, పోలీసులు తెలిపిన వివరాల మేరకు.. పట్టణంలోని వాల్మీకీనగర్‌లో నివాసముంటున్న మల్లికార్జున, మంజుల దంపతుల పెద్ద కుమారుడు యశ్వంత్‌ (12) కళ్లీమఠం పాఠశాలలో ఆరో తరగతి చదువుతున్నాడు. ప్రస్తుతం సెలవులు కావడంతో స్నేహితులతో కలిసి ఆడుకునేందుకు గురువారం బయటకు వెళ్లాడు. రాత్రి అయినా ఇంటికి రాకపోవడంతో తమ కుమారుడు కనిపించడంలేదని శుక్రవారం ఉదయం పోలీసులకు తల్లిదండ్రులు ఫిర్యాదు చేశారు. స్నేహితులను విచారించి ఈతకు వెళ్లినట్లు తెలుసుకున్నారు. పట్టణ శివారు గౌడ లేఅవుట్‌లోని నీటికుంటలో గాలించి బాలుడి మృతదేహాన్ని గుర్తించారు. పోలీసులు కేసు నమోదు చేసి దర్యాప్తు చేస్తున్నారు.