భద్రత ఆదమరిస్తే ప్రాణాలు గాల్లోకి..!

తలుపుల, న్యూస్‌టుడే: తలుపుల మండలం బి.కొత్తపల్లి సమీపంలో కదిరి-పులివెందుల ప్రధాన రెండు వరుసుల రహదారి కోతకు గురైంది. అక్కడే కల్వర్టు ప్రమాదకరంగా మారినా అధికారులు, ప్రజాప్రతినిధులెవరూ పట్టించుకోవడం లేదని వాహనచోదకులు, సమీప గ్రామస్థులు వాపోతున్నారు. గతేడాది కురిసిన కుండపోత వర్షాల కారణంగా మండలంలో వంకలు, వాగులు ఉప్పొంగి ప్రవహించాయి. ఈ ధాటికి పలు రోడ్లు దెబ్బతిన్నాయి. కల్వర్టులు శిథిలావస్థకు చేరుకున్నా పట్టించుకొనేవారు కరవైయ్యారు. బి.కొత్తపల్లి కల్వర్టు వద్ద వంద అడుగులవరకు రోడ్డు కోతకు గురైనా సంబంధిత అధికారులు మరమ్మతులు చేయలేదు. ప్రమాద సూచికలు ఏర్పాటు చేయలేదు. ప్రయాణికుల భద్రతను అధికారులు గాలికి వదిలేశారనే విమర్శలున్నాయి. ప్రమాదాలు జరగకముందే అధికారులు, ప్రజాప్రతినిధులు స్పందించి కల్వర్టును బాగుచేయించాలని వాహన చోదకులు కోరుతున్నారు.