గణతంత్ర వేడుకలపై సమీక్ష

మాట్లాడుతున్న కలెక్టర్‌ నాగలక్ష్మి, పక్కన ఎస్పీ ఫక్కీరప్ప, జేసీలు నిశాంత్‌, గంగాధర్‌గౌడ్‌, ఉప కలెక్టర్‌ నవీన్‌

జిల్లా సచివాలయం, న్యూస్‌టుడే: కొవిడ్‌ మూడో ఉద్ధృతి కొనసాగుతున్న క్రమంలో తగిన మార్గదర్శకాలను దృష్టిలో ఉంచుకుని గణతంత్ర వేడుకలు నిర్వహించాలని కలెక్టర్‌ నాగలక్ష్మి సూచించారు. శుక్రవారం కలెక్టరేట్‌ రెవెన్యూ భవన్‌లో ఎస్పీ ఫక్కీరప్ప, జేసీ నిశాంత్‌కుమార్‌లతో కలిసి జిల్లా అధికారులతో ప్రత్యేకంగా సమీక్షించారు. ఈ సందర్భంగా కలెక్టరు మాట్లాడుతూ ఈనెల 26న గణతంత్ర దిన వేడుకలను జాతీయ సమైక్యతా స్ఫూర్తి ఉట్టిపడేలా చేపట్టాలన్నారు. పోలీసు పరేడ్‌ మైదానంలో కొవిడ్‌ నిబంధనలపై ప్రచారం చేయాలని, ఆ మేరకు బోర్డులను ఏర్పాటు చేయాలని ఆదేశించారు. మాస్కు లేనిదే ఎవరినీ అనుమతించొద్దన్నారు. సాంస్కృతిక కార్యక్రమాల్లో పాల్గొనే విద్యార్థుల ఆరోగ్యంపై దృష్టి సారించాలన్నారు. పది నుంచి 12 మాత్రమే శకటాలు ఉండేలా చూడాలని అధికారులకు నిర్దేశించారు. ఈ వేడుకల సందర్భంగా అవార్డులకు ఎంపిక ప్రక్రియ పకడ్బందీగా ఉండాలన్నారు. ఉత్తమ పనితీరు, మంచి రికార్డు కల్గిన వారిని ఎంపిక చేయాలని, శనివారంలోగా ఆయా శాఖల నుంచి జాబితాలు డీఆర్వో కార్యాలయానికి అందజేయాలని సూచించారు. ఈ సమావేశంలో జేసీ గంగాధర్‌గౌడ్‌, పెనుకొండ ఉప కలెక్టర్‌ నవీన్‌, శిక్షణ కలెక్టర్‌ సూర్యతేజ తదితరులు పాల్గొన్నారు.