వీఆర్వోపై కేసు నమోదు

గాండ్లపెంట: తహసీల్దార్‌ సంతకాన్ని ఫోర్జరీ చేసి జనన ధ్రువపత్రం మంజూరు చేసిన మల్లమీదపల్లి వీఆర్వో నరసింహులుపై కేసు నమోదు చేసినట్లు ఎస్సై మల్లికార్జునరెడ్డి తెలిపారు. ఎస్సై తెలిపిన వివరాల మేరకు.. మల్లమీదపల్లికి చెందిన రామాంజులమ్మ ప్రావిడెంట్‌ ఫండ్‌ పొందేందుకు జనన ధ్రువపత్రం కోసం వీఆర్వోకు దరఖాస్తు చేశారు. వీఆర్వో అవకతవకలకు పాల్పడి గతేడాది నవంబరు 21న తహసీల్దార్‌ ఫోర్జరీ సంతకంతో కూడిన ధ్రువపత్రాన్ని మంజూరు చేశారు. తహసీల్దార్‌ వెంకటరమణ ఫిర్యాదు మేరకు వీఆర్వోను విచారించగా నల్లమాడ మండలం రెడ్డిపల్లి సమీపంలోని బపనకుంటకు చెందిన కృష్ణారెడ్డికి రూ.1500 అందజేసి విశ్రాంత తహసీల్దార్‌ సంతకాన్ని ఫోర్జరీ చేసినట్లు అంగీకరించాడు. కృష్ణారెడ్డిపై గతంలో అనేక కేసులు ఉన్నట్లు ఎస్సై తెలిపారు. సదరు వీఆర్వో మల్లమీదపల్లికి చెందిన సుభాన్‌ నుంచి రూ.5 వేలు తీసుకొని జనన ధ్రువపత్రం ఇచ్చినట్లు విచారణలో తేలిందన్నారు. సుభాన్‌, కృష్ణారెడ్డిని విచారిస్తున్నామని, ఉన్నతాధికారులకు సమాచారం తెలియజేసి వారి ఆదేశాల మేరకు చర్యలు తీసుకుంటామని ఎస్సై తెలిపారు.