తహసీల్దారు, వీఆర్వోల సంతకాలు ఫోర్జరీ

గుంతకల్లు గ్రామీణం, న్యూస్‌టుడే: తహసీల్దారు, వీఆర్వోల సంతకాలు ఫోర్జరీ చేసిన ఘటన ఆలస్యంగా వెలుగులోకి వచ్చింది. పట్టణంలోని 77 సెంట్ల భూమిని కబ్జాదారులు అధికారుల సంతకాలు ఫోర్జరీ చేసి తమ పేరిట ఆన్‌లైన్‌లో రిజిస్టర్‌ చేయించుకున్నారు. కబ్జాదారులు మొదటగా గుంతకల్లు సబ్‌ రిజిస్ట్రార్‌ కార్యాలయం, బుక్కపట్నంలోని మండల జాయింట్‌ సబ్‌ రిజిస్ట్రార్‌ కార్యాలయంలో రిజిస్టర్‌ చేయించాలని ప్రయత్నించగా సరైన ధ్రువపత్రాలు లేకపోవడంతో సంబంధిత అధికారులు తిరస్కరించారు. ఎలాగైనా భూమిని తమ పేరిట రిజిస్టర్‌ చేసుకోవాలని సదురు భూమి తమ అనుభవంలో ఉన్నట్లు నకిలీ ధ్రువపత్రాలు సృష్టించి అందులో తహసీల్దారు రాము, వీఆర్వో శ్రీనివాసరెడ్డిల సంతకాలను ఫోర్జరీ చేశారు. విషయం తెలుసుకున్న తహసీల్దారు ఫోర్జరీకి పాల్పడిన వారిపై టూటౌన్‌ పోలీసులకు ఫిర్యాదు చేసినట్లు సమాచారం.