దేవరింటిపల్లిలో సంబరాలు

బిగ్‌బాస్‌ జ్ఞాపిక, తల్లిదండ్రులు నిర్మల, భాస్కర్‌రెడ్డితో బిందుమాధవి

నల్లచెరువు, న్యూస్‌టుడే: ఓటీటీలో ప్రసారమైన బిగ్‌బాస్‌ టీవీ షో విజేతగా హీరోయిన్‌ బిందుమాధవి నిలిచింది. ఆమె తండ్రి భాస్కర్‌రెడ్డి శ్రీసత్యసాయి జిల్లా నల్లచెరువు మండలం దేవరింటిపల్లికి చెందినవారు. డీసీటీవోగా పదవీ విరమణ చేశారు. తల్లి నిర్మల గృహిణి. అయితే బిందుమాధవి ఆమె తండ్రి మదనపల్లిలో ఉద్యోగం చేసే సమయంలో జన్మించారు. బిగ్‌బాస్‌ ఓటీటీ వెర్షన్‌లో విజేతగా నిలిచినట్లు సమాచారం రావడంతో శనివారం సాయంత్రం దేవరింటిపల్లిలో కేకు కోసి సంబరాలు చేసుకున్నారు. హైదరాబాద్‌లోని తన ఇంట్లో బిందుమాధవి సంబరాలు చేసుకున్నట్లు ఆమె తండ్రి భాస్కర్‌రెడ్డి తెలిపారు.