ఏఆర్‌ కానిస్టేబుల్‌ ప్రకాష్‌కు షోకాజ్‌ నోటీసులు?

అనంత నేరవార్తలు, న్యూస్‌టుడే: ‘పోలీసులకు చెల్లించాల్సిన బకాయిలపై ఈనెల 14న అనంతపురం పోలీసు జిల్లా కార్యాలయంలో ‘సేవ్‌ ఏపీ పోలీస్‌’ నినాదంతో నిరసన తెలిపిన ఏఆర్‌ కానిస్టేబుల్‌ ప్రకాష్‌కు రెండ్రోజుల కిందట ఉన్నతాధికారులు సంజాయిషీ నోటీసులు జారీ చేసినట్లు తెలిసింది. నిరసన ఘటనపై ఓ సీఐ, ఓ ఏఎస్పీ జిల్లా పోలీసు ఉన్నతాధికారికి రిపోర్టు పంపినట్లు సమాచారం. ఈ రిపోర్టును అనుసరించి సదరు అధికారి.. కానిస్టేబుల్‌కు సంజాయిషీ నోటీసు జారీ చేసినట్లు తెలిసింది. క్రమశిక్షణను ఉల్లంఘించి అమరవీరుల స్థూపం వద్ద నిరసన తెలపడం నేరమని అందులో పేర్కొన్నారు. అలాగే గతంలో కానిస్టేబుల్‌పై నమోదైన కేసుపై సైతం సంజాయిషీ, ఆపై నేర నిరూపణ నోటీసులు అందజేసినట్లు తెలుస్తోంది. ఒకేరోజు మూడు నోటీసులు ఇవ్వడం గమనార్హం. సదరు కానిస్టేబుల్‌ ప్రభుత్వానికి వ్యతిరేకంగా నిరసన తెలిపినందుకే ఈ చర్యలన్నీ అనే విమర్శలు వినిపిస్తున్నాయి.