అక్రమార్కులపై కొరడా

‘రెవెన్యూ’లో అలజడి

ఎవరిపై చర్యలు

పుట్లూరు మండలం తహసీల్దార్‌పై పలు ఆరోపణలు వచ్చాయి. గతంలో శింగనమలలో పనిచేసిన సమయంలోనూ ఇష్టారాజ్యంగా కొండలు, గుట్టలు, ప్రభుత్వ భూములకు పట్టాలు ఇచ్చారు. పుట్లూరులో లేనిభూమికి 1బీ, అడంగల్‌ ఇచ్చేసిన వైనం వెలుగు చూసింది. దీంతో తహసీల్దార్‌ విజయకుమారికి ఉప తహసీల్దార్‌గా రివర్సన్‌ ఇచ్చేశారు. శింగనమలలో తహసీల్దార్‌కు వంతపాడిన టైపిస్టు ధనలక్ష్మిపై చర్య తీసుకున్నారు. ఈమెను ఏకంగా వాచ్‌మెన్‌గా రివర్సన్‌ ఇవ్వడం విశేషం. ప్రస్తుతం ఈమె ఉరవకొండలో పని చేస్తున్నట్లు తెలుస్తోంది. ఎన్‌పీకుంట తహసీల్దారు రమణ కూడా రివర్సన్‌కు గురయ్యారు. తప్పుడు సర్వే నంబర్లతో రిజిస్ట్రేషన్‌, భూ రికార్డులు తారుమారు చేశారన్న అభియోగంపై కూడేరు తహసీల్దార్‌కు తాఖీదు ఇవ్వగా, వీఆర్వోను సస్పెండ్‌ చేశారు.

ఆగని అక్రమాలు

వైకాపా అధికారంలోకి వచ్చిన తర్వాత భూ అక్రమాలు పెచ్చుమీరాయి. వెబ్‌ల్యాండ్‌లో అక్రమాలు, భూమి రికార్డులు తారుమారు, హక్కుదారుల పేర్లు తొలగించి అడ్డగోలుగా ఇతర పేర్లు నమోదు చేయడం, ప్రైవేట్‌ భూముల రికార్డులు సైతం సవరణలు చేయడం.. ఇలా అనేక అక్రమాలు నిత్యకృత్యంగా మారాయి. శింగనమల, పుట్లూరు, కదిరి ప్రాంతాల్లోని అధికారులపై చర్య తీసుకున్నా అక్రమాలు తగ్గడం లేదు. తమకేమీ సంబంధం లేదనట్లుగా కొన్ని ప్రాంతాల్లో తహసీల్దార్లు, ఉప తహసీల్దార్లు, వీఆర్వోలు, ఆర్‌ఐలు తన చేతివాటాన్ని ప్రదర్శిస్తూనే ఉన్నారు. అనంత గ్రామీణం, కూడేరు, నార్పల, బీకే సముద్రం, కళ్యాణదుర్గం, రాప్తాడు వంటి ప్రాంతాల్లో అక్రమాలు తెరపైకి వస్తున్నాయి. ఎప్పటికప్పుడు.. ఎక్కడికక్కడ చర్యలు తీసుకుంటే తప్ప వాటికి కళ్లెం పడటం కష్టం.