Anantapur: బాలికపై హత్యాయత్నం ఘటనలో గ్రామ వాలంటీరు?

అనంత నేరవార్తలు, న్యూస్‌టుడే: ఈ నెల 1న కళ్యాణదుర్గం మండలం బోయలపల్లి గ్రామ సమీపంలో ఓ బాలికపై భాస్కర్‌ అనే యువకుడు కారుతో ఢీకొట్టి హత్యాయత్నం చేసిన ఘటన పాఠకులకు విదితమే. ఇప్పటికే నిందితుడిపై పోలీసులు కేసు నమోదు చేసి రిమాండ్‌కు పంపారు. బాలికను వేధింపులకు గురి చేసిన వారిలో నిందితుడికి మామ వరసయ్యే (బుక్కరాయసముద్రం మండలం అమ్మవారిపేట) కుళ్లాయప్ప ముఖ్యుడని తెలిసింది. ఇతను ప్రస్తుతం అమ్మవారిపేటలో గ్రామ వాలంటీరుగా పనిచేస్తున్నాడు. బాలికను కళ్యాణదుర్గంలో కిడ్నాప్‌ చేసి కారులో తీసుకెళ్లడంలో కీలకపాత్ర పోషించినట్లు పేర్కొన్నారు. కారులో బాలికపై దాడిచేసి భాస్కర్‌ను పెళ్లి చేసుకోవాలని బెదిరించాడని, వదిలేయమని వేడుకున్నా భాస్కర్‌తో పాటు కుళ్లాయప్ప అనుచితంగా ప్రవర్తించారని బాధితురాలు చెప్పినట్లు సమాచారం. కేసులో సదరు వాలంటీరు లేకుండా ఓ వైకాపా నాయకుడు పోలీసులపై ఒత్తిడి చేశాడని తెలిసింది. వాలంటీర్‌పై గతంలో బుక్కరాయసముద్రం పోలీస్‌స్టేషన్‌లో ఫిర్యాదు నమోదైనట్లు సమాచారం. అతనిపై కేసు నమోదు చేసి శిక్షించాలని బాధితురాలి బంధువులు డిమాండ్‌ చేస్తున్నారు.