కుళ్లాయిస్వామి గోవిందా..

కనుల పండువగా పెద్ద సరిగెత్తు

ప్రత్యేకాలంకరణలో ఆంజనేయస్వామి

నార్పల గ్రామీణం, న్యూస్‌టుడే: మత సామరస్యానికి ప్రతీకైన గూగూడు కుళ్లాయిస్వామి ఉత్సవాలు భక్తిశ్రద్ధలతో జరుగుతున్నాయి. సోమవారం పెద్దసరిగెత్తు కనుల పండువగా సాగింది. తెల్లవారుజామున డప్పు, వాయిద్యాల నడుమ స్వామిని ఊరేగించారు. ఆలయ ప్రధాన అర్చకుడు హుసేనప్ప ఆధ్వర్యంలో కుళ్లాయిస్వామితోపాటు కొలువుదీరిన 21 పీర్లకు ప్రత్యేక పూజలు చేశారు. స్వామిని వెండి, బంగారు గొడుగులతో అలంకరించారు. భక్తులు పానకాలు సమర్పించి, చక్కెర చదివింపులతో మొక్కులు చెల్లించారు. కొందరు భక్తులు తలనీలాలు సమర్పించి వెండి గొడుగులు అందజేశారు. ఎండు కొబ్బరి అగ్నిగుండంలో వేసి కుళ్లాయిస్వామి గోవిందా అంటూ అగ్నిగుండం చుట్టూ పొర్లు దండాలతో వేడుకున్నారు. అలాగే ఆంజనేయస్వామి ఆలయంలో పూజారి వెంకటరాయ చలపతి ఆధ్వర్యంలో స్వామికి అర్చనలు, అభిషేకాలు చేశారు. పెద్దసంఖ్యలో భక్తులు తరలివచ్చారు. మంగళవారం సాయంత్రం స్వామితోపాటు 21 పీర్లు అగ్నిగుండ ప్రవేశంతో జలధికి తరలివెళ్లనున్నాయి. సీఐ అస్రార్‌ బాషా, ఎస్సై వెంకటప్రసాద్‌ ఆధ్వర్యంలో గట్టి బందోబస్తు చర్యలు చేపట్టారు.